Բժիշկները զգուշացնում են` «մի թերագնահատեք վիրուսների հետեւանքները»: Նրանց խոսքով`հատկապես հղիների համար բոլոր վիրուսները վտանգավոր են` գրիպից մինչև հերպես և ցիտոմեգալովիրուս
Վերջինները կարող են անգամ անպտղության պատճառ դառնալ: Ընդ որում, այդ վիրուսները գարող են ի հայտ գալ թե կանանց, թե տղամարդկանց մոտ: Իսկ հղիության ժամանակ այդ վիրուսները կարող են ճակատագրական լինել:
Հղիության ընթացքում վիրուսային պարտադիր հետազոտություններ կատարվում են այն ժամանակ, երբ հղիի մոտ նկատվում է որևէ ախտանիշ, կամ երբ պտուղը սովորական աճից հետ է ընկնում:
N 1 ծննդատան գինեկոլոգ Նաիրա Վարդանյանը ասում է, որ վիրուսները որևէ կոնկրետ արտահայտման ձև չունեն, կարող են գրիպի տեսքով արտահայտվել, որի պատճառով էլ հղիները մտածում են, թե իրենց մոտ մրսածություն է:
«Հղիության ընթացքում վիրուսի պատճառով պտուղը կարող է մահանալ արգանդի խոռոչում կամ զարգանալ` նյարդային և սրտանոթային արատներով»,- նշում է Վարդանյանը` հատուկ նշելով, որ դրանք վիրուսների վատագույն հետեւանքներն են:
Նրա խոսքով` վիրուսներից կարող են առաջանալ ֆունկցիոնալ շեղումներ`այսինքն` երեխաները ծնվեն առանց արատների, բայց ժամանակի ընթացքում նկատվի խլություն, կուրություն, մտավոր հետամնացություն, էպիլեպսիա:
Հղիությունը կանխող կամ պտղի զարգացումն ու աճը խոչընդոտող վիրուսներից են էկովիրուսը, հերպեսը` այսպես կոչված գենետալ հերպեսը, ցիտոմեգալովիրուսը: Սրանցից յուրաքանչյուրն էլ շատ վտանգավոր է, քանի որ որոշերը դրսեւորմա կոնկրետ ձեւ չունեն:
«Հերպեսը տարածվում է միայն սեռական ճանապարհով, իսկ ցիտոմեգալովիրուսի տարածումը կարող է լինել նաեւ օդակաթիլային: Շատ հաճախ ցիտոմեգալովիրուսը կոչում են նաև համբույրների վիրուս, քանի որ փոխանցվում է թքագեղձերի՝ թքի միջոցով»,- բացատրում է գինեկոլոգը:
Արգանդային վիրուսներից գինեկոլոգը առանձնացնում է նաև պապիլոմա վիրուսը, բայց հստակեցնում,որ հղիության հետ ոչ մի կապ չունի: Այն ընդունված է կոչել որպես քաղցկեղի հարուցիչ. հանդես է գալիս որպես նախաքաղցկեղային, քաղցկեղային հիվանդություն՝ այսինքն` վտանգավոր է կնոջ օրգանիզմի նորմալ ֆունկցիայի համար:
Սովորական թվացող գրիպի դիմաց հղիության ընդհատմամբ հատուցած Իրինան, խորհուրդ է տալիս բոլոր հղիներին լինել շատ զգույշ, խուսափել ամեն տեսակի վիրուսային հիվանդություններից, հղիանալուց առաջ` հետազոտվել, իսկ հղիության ընթացքում էլ լինել առավելագույնս զգոն:
Անի Ասատրյան