«Ինչու՞ եմ սեռական հարաբերության ժամանակ ունենում ցավեր». «Իմ փոքրիկ»-ին ուղղված այս եւ մյուս հարցերի պատասխանները

Հարգելի Սաթեն,

Ձեր նկարագրած երևույթները հավանաբար կապված են տամպոնների օգտագործման հետ, սակայն հեռակա կարգով դժվարանում եմ ասել՝ սնկային ծագում ունեն դրանք, թե պատճառները այլ են: Դիմեք Ձեր բժշկին, ներկայացրեք գանգատները, հանձնեք հեշտոցային արտադրության քսուքի անալիզ, որից հետո պարզ կլինի բուժման պլանը:

Մարիամ
Հարց: Առաջին երեխաս ունեցել եմ կեսարյան վիրահատությամբ: Կարո՞ղ եմ հաջորդ երեխան ունենալ ծննդաբերությամբ,  որքա՞ն պետք է լինի ինտերվալը:

Պատասխան: Հարգելի Մարիամ,

հղիությունը խորհուրդ է տրվում պլանավորել կեսարյան հատումից 48 ամիս անց: Բնական ճանապարհով ծննդաբերությունը կեսարյան հատումից հետո հնարավոր է, սակայն հաջող ավարտը կախված է մի քանի գործոններից` ի՞նչ ցուցումներով  է կատարվել կեսարյան հատումը, պլանային է եղել այն, թե շտապ, ինչպես է ընթացել հետվիրահատական շրջանը և այլն: Նման ծննդաբերությունը պետք է վարել երրորդ մակարդակի ծննդատան պայմաններում, բարձր որակավորման մասնագետի կողմից: Հաշվի առեք, որ Ձեր երեխայի համար կրկնակի կեսարյան հատումն  ավելի անվտանգ ծննդալուծման եղանակ է:

Օֆելյա
Հարց: Ձվազատումից քանի՞ օր հետո կարելի է  թեստ անցկացնել:

Պատասխան: Հարգելի Օֆելյա, հղիության ամենազգայուն թեստերը խորհուրդ է տրվում կիրառել դաշտանային ցիկլի 25- 26-րդ օրերից սկսած, երբ դաշտանի ուշացում դեռ չկա: Սակայն թեստերի մեծամասնությունը  դրական արդյունք են ցույց տալիս դաշտանի 1-2 օր ուշացման դեպքում:

Էլեն
Հարց: Հարգելի բժիշկ, ինձ մոտ դաշտանը երկու օր ուշացել է, թեստը դրական է: Անտեղյակ լինելով հղիության մասին մոտ չորս բաժակ օղի եմ խմել: Ցանկանում եմ իմանալ՝  կարո՞ղ է այդ չափաբաժինը վնասել պտղին:  Կանխավ շնորհակալություն:

Պատասխան: Հարգելի Էլեն, ալկոհոլը վնասակար է պտղի համար, նամանավանդ հղիության սկզբնական շրջանում, երբ ձևավորվում են բոլոր օրգան-համակարգերը: Ալկոհոլի օգտագործումը սաղմի ձևավորման փուլում կարող է բերել արատների և մտավոր թերզարգացման:

Շահանե
Հարց: Ես հղիության 2,5 շաբաթականում եմ, ունեմ քիչ քանակությամբ սպիտակուց: Դա վնասակա՞ր է իմ ու երեխայի համար:

Պատասխան: Հարգելի Շահանե, եթե մեզում առկա է սպիտակուց, նախ պետք է վերահանձնել մեզի անալիզը, քանի որ Դուք կարող էիք այն սխալ վերցնել (մեզը խառնված լիներ հեշտոցային արտադրության հետ): Մեզում սպիտակուց հայտնաբերելու դեպքում անհրաժեշտ է դիմել նեֆրոլոգին (երիկամային հիվանդություններով զբաղվող բժիշկ):

Հասմիկ
Հարց: Բարև Ձեզ բժիշկ , խնդրում եմ Ձեզ պատասխանել հետևյալ հարցիս. ես հղի եմ 5 շաբաթական, բայց դեռեւս կոնսուլտացիայի  չեմ գնացել: Առաջին հղիությունս է , ունեմ ողնաշարի սկոլիոզ, սակայն ինձ մինչ օրս չի անհանգստացրել. այն ձեռք եմ բերել հասունացման տարիքում:  Խնդրում եմ, ասեք՝ նման դեպքեր եղե՞լ են Ձեր պրակտիկայում, ի՞նչ խնդիրներ կարող են լինել ինձ հետ: Նախապես շնորհակալ եմ

Պատասխան: Հարգելի Հասմիկ, իմ մասնագիտական գործունեության ընթացքում հանդիպել եմ սկոլիոզով տառապող հղիների, վարել եմ նրանց հղիությունը և ծննդաբերությունը: Սկոլիոզ ունեցող հղիների մոտ կարող են լինել ցավեր՝ կապված ողնաշարի ծանրաբեռնման և ճնշման հետ: Հղիությունը պետք է վարել ողնաշարաբանի /վերտևրոլոգի/ կամ վնասվածքաբան-օրթոպեդի հետ համատեղ: Սկոլիոզը ցուցում չէ կեսարյան հատման համար, եթե այն չի համակցվում ողնաշարի այլ փոփոխությունների կամ կոնքի դեֆորմացիայի հետ: Նման դեպքերում ծննդաբերության եղանակը /բնական ուղիներով կամ վիրահատական/ որոշվում է հարակից մասնագետների հետ միասին:

Անի Կարապետյան
Հարց: Բարև Ձեզ: Իմ հարցը հետևյալն է. ես 1 տարի, 2 ամիս ամուսնացած եմ, սակայն չեմ հղիանում, ինձ մոտ առկա էր ուրեոպլազմա, սակայն այն վաղուց բուժվել է: Ինձ նշանակել են ֆոլիկուլյար սոնոգրաֆիա,  պետք է հետազոտվեմ: Ասացեք խնդրեմ, եթե պարզվի, որ ինձ մոտ ֆոլիկուլներն  ուշ են պայթում, դա կհանգեցի՞ չբերության, և ո՞րն է հետագա քայլը կամ բուժումը: Ի՞նչ դեղորայք կառաջարկեք: Նշեմ նաև, որ ես էլ, ամուսինս էլ ամեն տեսակի անալիզներ հանձնել ենք և ոչ մի խնդիր չենք ունեցել: Կանխավ շնորհակալ եմ

Պատասխան: Հարգելի Անի,  չբերության բուժումը չի կատարվում հեռակա կարգով, այսինքն՝ ես իրավասու չեմ նշանակել Ձեզ որևէ դեղորայք: Եթե ֆոլիկուլոմետրիայի արդյունքում պարզվի, որ Ձեզ մոտ չկա ձվազատում, կամ լորձաթաղանթն է բարակ, կամ ձվազատումը ուշ է կատարվում, ապա դա կարող է անպտղության պատճառ լինել: Անգամ եթե ձվազատում կա, սակայն հղիություն չկա,  Դուք պետք է դիմեք մարդու վերարտադրողական առողջության որևէ կլինիկա (օրինակ`  Շենգավիթ բժշկական կենտրոն), լիարժեք հետազոտվեք:  Հնարավոր է՝ կա հավելյալ բուժման կամ որևէ օժանդակ վերարտադրողական տեխնոլոգիաների կիրառման անհրաժեշտություն:

Արևիկ
Հարց: Բարև Ձեզ:  Մի հարց ինձ շատ է անհանգստացնում: Ես ամուսնացած եմ արդեն 3 ամիս, ինձ մոտ նորմալ սեռական հարաբերություններ են տեղի ունենում: Ամուսնությունից հետո առաջին դաշտանը նորմալ է եղել, սակայն երկրորդ ամսում՝ դաշտանից մի շաբաթ առաջ, ունեցա ցավեր, երկու օր ուշացավ, հղիության թեստ արեցի, բայց արդյունքը բացասական էր: Երրորդ օրը դաշտանս սկսվեց, սակայն արյունահոսությունը շատ քիչ է, նույնիսկ երկրորդ օրը գրեթե չէր զգացվում, որ ինձ մոտ դաշտանի օրերն են: Կարո՞ղ եք ասել՝ դա ինչից է: Կանխավ շնորհակալություն:

Պատասխան: Հարգելի Արևիկ,  ամուսնությունից հետո կնոջ օրգանիզմում տեղի են ունենում որոշակի հորմոնալ փոփոխություններ, որոնց հետևանքով դաշտանային ցիկլը կարող է խանգարվել: Ձեր նկարագրած իրավիճակում հղիության հավանականությունը շատ փոքր է: Դիմեք գինեկոլոգի, բացառեք բորբոքային հիվանդությունները որպես դաշտանային ցիկլի խանգարման ոչ որոշիչ գործոն, կատարեք փոքր կոնքի օրգանների գերձայնային հետազոտություն, անհրաժեշտության դեպքում` հորմոնալ հետազոտություններ: Հիմնվելով այդ հետազոտությունների արդյունքների վրա՝  Ձեր բժիշկը կանի ախտորոշում, կտա համապատասխան խորհուրդներ:

Էլիզա
Հարց: Ձեր թույլտվությամբ մի այսպիսի հարց ունեմ՝ ի՞նչ հաճախականությամբ է կարելի  օգտագործել պահպանակ սեռական հարաբերությունների ժամանակ՝ մասնավորապես 2 ամսվա ամուսնացած զույգերի պարագայում:

Պատասխան: Հարգելի Էլիզա, պահպանակի օգտագործման համար սահմանափակումները եզակի են: Դա ալերգիան է լատեքսի նկատմամբ /մեծամասամբ տղամարդկանց մոտ/, սեքսուալ զգացողությունների պակասում, որոշ տղամարդկանց մոտ էրեկցիայի խանգարում: Եթե զույգի մոտ չկան վերը նշված երևույթները, ապա պահպանակը կարող եք օգտագործել յուրաքանչյուր  հարաբերության ժամանակ: Հիշեք նաև, որ պահպանակի պատռման դեպքում Դուք կարող եք հղիանալ:

Կարինե
Հարց: Վերջերս հարաբերություն ունենալիս որովայնիս հատվածում սուր ցավեր է զգացվում: Խնդրում եմ, պատասխանեք՝ ինչից կարող է լինել դա:

Պատասխան: Հարգելի Կարինե,  հարաբերության ժամանակ ցավեր կարող են լինել ներքին և արտաքին սեռական օրգանների բորբոքային հիվանդությունների, ուռուցքանման գոյացությունների, էնդոմետրիոզի, ինչպես նաև հոգեբանական խնդիրների դեպքում: Դիմեք գինեկոլոգի, կատարեք անհրաժեշտ հետազոտություններ (հեշտոցային արտազատուկի և պարանոցային լորձի բակտերիոսկոպիկ և մանրէաբանական քննություն, փոքր կոնքի օրգանների ուլտրաձայնային (գերձայնային) հետազոտություն և այլն), ինչը կօգնի բժշկին տալ ճիշտ ախտորոշում և համապատասխան խորհուրդներ:

Տաթև
Հարց: Բարև Ձեզ: Խնդրում եմ, ինձ կասե՞ք՝ ինչ է իրենից ներկայացնում գարդներելա վիրուսը, ինչպե՞ս կարելի է այն բուժել:

Պատասխան: Հարգելի Տաթև, գարդներելեզը հեշտոցային դիսբիոզ է: Հարուցիչը Gardnerella vaginalis-ն է:  Հղիության ժամանակ այն կարող է դառնալ վաղաժամ ծննդաբերության պատճառ: Գարդներելեզն առանձին չի հանդիսանում անպտղության պատճառ, սակայն կան հարուցիչներ, որոնք համակցված են Gardnerella vaginalis-ի հետ (տարատեսակ միկոպլազմաներ) և այդ համալիրը կարող է առաջացնել փոքր կոնքի օրգանների բորբոքային հիվանդություններ: Իսկ այդ հիվանդությունները բերում են անպտղության գործոնների զարգացմանը: Բուժման համար դիմեք բժշկի:

Մանե
Հարց: Բարև Ձեզ: Հարգելի բժիշկ,  ինձ մոտ դաշտանային ցիկլը միշտ խախտված է եղել՝ 1 ամիս լինում էր, մի քանի ամիս՝ ոչ: Դիմել եմ մասնագետի, բուժումներ ստացա, սակայն կրկին խախտվեց: Այժմ ամուսնացած եմ, և արդեն 2 ամիս է՝ նորմալ է, սակայն այս անգամ արդեն 4 օր է՝ ուշացել է, չնայած մեջքիս հատվածում ունեմ ցավեր:  Ցանկանում եմ իմանալ՝ կարո՞ղ եմ ես հղիանալ:

Պատասխան: Հարգելի Մանե, հղիությունը որոշելու համար պետք է կատարել մարդու քորիոնիկ գոնոդոտրոպինը որակական (միզային թեսթ) կամ քանակական (արյան շիճուկում) հայտնաբերման թեսթեր: Հորմոնալ խանգառումները կարող են չհղիանալու պատճառ դառնալ, եթե խաթարում են ձվազատումը, կամ բերում են արգանդի լորձաթաղանթի ախտահարման և այլ փոփոխությունների: Եթե դաշտանի ուշացումը կապված չէ հղիության հետ, ապա կրկին դիմեք գինեկոլոգ-էնդոկրինոլոգի՝ հետազոտման և բուժման համար:

Նազիկ
Հարց: Ինձ մոտ առկա է էրոզիա: Բուժման ընթացքում օգտագործել եմ դեպանտոլ մետրոնիզադոլ (ես և ամուսինս) սեֆտրիոքսին գենֆերոն գեկսիկոն բետադին: Կատարել են նաեւ կրիոթերապիա  (ինչը մեկ այլ բժշկի մոտ հետազոտելուց հետո պարզվել է, որ չեն կատարել: Բուժումից հետո էրոզիան դեռ չի անցել: Բջջաբանական հետազոտությունը ցույց է տալիս՝ նմուշի որակը ադեկվատ, ռեակտիվ փոփոխությունները թույլ արտահայտված բորբոքում, ռեգեներացիա (պրոգեսվալ էկտոպրիա):  Խնդրում եմ, ասեք՝ ինչ անեմ, վտանգավո՞ր է, արդյոք, եւ կարելի՞ է այդպես հիղիանալ: Նշեմ, որ ամուսնացած եմ, ունեմ երկու տարեկան դուստր:

Պատասխան: Հարգելի Նազիկ, ձեր նկարագրած իրավիճակը չի վկայում որևէ լուրջ վտանգի մասին: Առաջնահերթ է կրկնել արգանդի պարանոցի բջջաբանական հետազոտությունը (PAP smear): Դուք այն արել եք, սակայն պատասխանը չի համապատասխանում արդի չափանիշների/ դասակարգումների: Եթե PAP smear պատասխանը լինի բացասական, ապա անհանգստանալ, առավել ևս բուժվել պետք չէ, կարող եք հանգիստ հղիանալ: Եթե PAP smear հետազոտության արդյունքում ի հայտ գան որևէ փոփոխություններ, ապա պետք է կատարել կոլպոսկոպիա, անհրաժեշտության դեպքում` պարանոցի ախտահարված հատվածի բիոպսիա, որից հետո մշակել հետագա գործողությունների պլան:

Գայանե
Հարց: 3 կամ 4 տարեկան երեխաների մոտ կուսաթաղանթը բավականաչափ առաձգակա՞ն է և զերծ կմնա՞ կողմնակի վնասվածքներից:

Պատասխան: Հարգելի Գայանե, ինչպիսի՞ կողմնակի վնասվածքների մասին է խոսքը:  3 կամ 4 տարեկան աղջկա արտաքին սեռական օրգանները դեռ լիովին զարգացած չեն: Կուսաթաղանթը վնասվում է սեռական հարաբերության, մեխանիկական վնասվածքի, սուր առարկաների վրա ընկնելիս և այլն: Իմ կարծիքով՝ Դուք պետք է հարցը ձևակերպեք ավելի հստակ և դիմեք մանկական գինեկոլոգի:

Էմիլյա
Հարց: Հարգելի բժիշկ, ես ունեմ մի հարց.  գտնվում եմ հղիության 5-րդ ամսում, մեջքս ու կողքերս ցավում են: Ի՞նչ կարող եմ անել:

Պատասխան: Հարգելի Էմիլյա, հղիության 5-րդ ամսում մեջքի և որովայնի ցավերը սովորաբար կապված են լինում սպառնացող վիժման/սպառնացող վաղաժամ ծննդաբերության, երիկամների ախտահարման, աղիքային խնդիրների, մկանային լարվածության հետ, ինչպես նաև 20 շաբաթականից սկսած կնոջ մոտ կարող են լինել կեղծ կծկանքներ (Braxton Hicks contractions): Անհրաժեշտ է դիմել բժշկի, որը կհետազոտի Ձեզ, մանրամասն կպատասխանի Ձեր հարցերին, որևէ ախտաբանություն հայտնաբերելու դեպքում կնշանակի համապատասխան բուժում:

Ինա
Հարց: Բարեւ Ձեզ: Մինչեւ մասնագետին հանդիպել նախ կուզենայի իմանալ՝  հույս կա, թե ոչ: Մենք այսպիսի մի խնդիր ունենք. ամուսինս սպերմոգրամմա է անցել եւ շարժունակությունը 1.09 % է, նորմալ սպերմատոզոիդներճանապարհով՞ը՝ 4%, ես հնարավորություն ունե՞մ արհեստական  հղիանալու: Ես 34 տարեկան են, ամուսինս՝ 46:

Պատասխան: Հարգելի Ինա, սերմի որակը չի որոշվում միայն սերմնաբջիջի շարժունակությամբ, կան մի շարք ուրիշ կարևոր ցուցանիշներ: Դիմեք մարդու վերարտադրողական առողջության որևէ կլինիկա (օրինակ` Շենգավիթ բժշկական կենտրոն), լիարժեք հետազոտվեք, հնարավոր է՝ կա անհրաժեշտություն կիրառել օժանդակ վերարտադրողական տեխնոլոգիաներ: Հույսը երբեք մի կորցրեք:  Եթե Ձեր նշած խնդիրներից բացի, չհայտնաբերվեն անպտղության ուրիշ պատճառներ, ապա խնդիրը կարող է շատ արագ լուծվել:

Անի
Հարց: Բարև ձեզ, ես մի հարց ունեմ: Ծննդաբերությունիցս անցել է երկու տարի, բայց դեռ դաշտան չեմ ունեցել: Գնացել եմ ստուգման, ասել են, որ դեռ շուտ է բուժման համար: Ոիլտրաձայնային հետազոտությունն էլ ցույց տվեց,  որ ձվարաններս լավ չեն գործում, և հորմոնների անալիզ պետք է հանձնեմ: Այս դեպքում երկրորդ հղիություն հնարավո՞ր է և ի՞նչ անալիզներ պետք է հանձնեմ: Կանխավ շնորհակալություն

Պատասխան: Հարգելի Անի, եթե Դուք դեռ կերակրում եք, ապա կա հավանականություն լակտացիոն ամենօռեայի (դաշտանի բացակայություն կերակրման ընթացքում): Եթե Դուք այլևս կրծքով չեք կերակրում, դաշտանադադարը կապված է հորմոնալ խանգարումների հետ: Ձեզ անհրաժեշտ է դիմել գինեկոլոգ-էնդոկրինոլոգի, որը կբացահայտի հիվանդության պատճառները, կկատարի համապատասխան հետազոտություններ, կնշանակի բուժում, որից հետո կկարողանաք հղիանալ:

Մարինա
Հարց: Հարգելի բժիշկ, ներքին բորբոքումներն ինչպե՞ս են զգացնել տալիս, եւ մանկական արգանդը ո՞րն է ու ինչպես է դա արտահայտվում:

Պատասխան: Հարգելի Մարինա, այդպես կոչված  ներքին բորբոքումների ներքո  ենթադրվում են փոքր կոնքի օրգանների բորբոքային հիվանդությունները, որոնց նշաններն են` ցավ որովայնի ստորին հատվածում, առատ, արտասովոր, երբեմն տհաճ հոտով արտադրություն սեռական ուղիներից, դաշտանային ցիկլի խանգարումներ և այլն: Ինչ վերաբերում է մանկական արգանդ հասկացությանը,  դա թերզարգացած /հիպոպլաստիկ/ արգանդի և դրանով պայմանավորված համախտանիշի կենցաղային անվանումն է: Այդ դեպքերում արգանդի չափսերը նորմայից փոքր են, արգանդի մարմին/պարանոց հարաբերությունը՝ 1:2:  Դաշտանային ցիկլը կարող է լինել անկանոն, մեծ ընդմիջումներով, արյան քանակը դաշտանի ընթացքում՝ քիչ:  Կարող է դառնալ անպտղության պատճառ:

Աննա
Հարց: Բարև ձեզ: Ես գտնվում եմ հղիության 31 շաբաթականում: Ինձ մոտ հազ և կոկորդի ցավ սկսվեց: Ինձ նշանակեցին ալտեի սիրոպ, ամբրոգեկսալ և մուկատին: Արդեն 5 օր խմում եմ, բայց բաղադրությունը նոր կարդացի և տեսա, որ ցանկալի չէ հղիության ընթացքում այս դեղերը օգտագործել: Խնդրում եմ, պատասխանեք՝ կարո՞ղ է որեւէ ազդեցություն ունենալ պտղի զարգացման վրա:

Պատասխան: Հարգելի Աննա, ճիշտ կլինի կրկին դիմեք այդ դեղամիջոցները նշանակող բժշկին՝ պտղի վրա նրանց բացասական ազդեցության հավանականությունը պարզաբանելու համար: Իմ փորձից կարող եմ ասել, որ այդ դեղերի 5  օրվա օգտագործումը շատ կարճ ժամանակահատված է՝  նրանց բացասական ազդեցությունը թողնելու համար:

Տաթև
Հարց: Բարև Ձեզ, բժիշկ: Բազմիցս լսել եմ, որ ասում են՝ երբ նոր ամուսնացած կնոջ  ցիկլն անկանոն է դառնում և ուշանում է, ուրեմն հաջորդ ամիս հղիանալու հավանականությունը մեծ է: Ճի՞շտ է, արդյոք, այդ կարծիքը:

Պատասխան: Հարգելի Տաթև, եթե նախքան ամուսնանալը դաշտանային ցիկլն անկանոն է եղել, ապա դա կարող է վկայել որևէ խնդիրի մասին: Նոր ամուսնացած կնոջ մոտ դաշտանային ցիկլը կարող է խանգարվել, քանի որ օրգանիզմում տեղի են ունենում որոշակի հորմոնալ փոփոխություններ: Սակայն չկան հավաստի, գիտականորեն հաստատված տվյալներ այն մասին, թե ցիկլի խանգարումը որքանով է նպաստում հաջորդ ցիկլում հղիանալուն:

Մոնա

Հարց: Խնդրում եմ, ասեք՝ հակաբեղմնավորիչ հաբեր օգտագործելու համար հարկավո՞ր է այցելել մասնագետի:  Եթե ոչ, կասե՞ք՝ ինչու:

Հարգելի Մոնա,

Պատասխան: Հակաբեղմնավորիչ դեղամիջոց օգտագործելուծ առաջ անհրաժեշտ է նախապես դիմել բժշկի: Նման դեղերի հեռակա նշանակումը կարող է բերել բարդությունների: