«Իմ փոքրիկ»-ը զրուցել է բժիշկ-սեքսոլոգ Սաթենիկ Սահակյանի հետ:
-Արդյո՞ք անվտանգ է համարվում հղիության ընթացքում սեքսով զբաղվելը:
-Թե՛ կանայք, թե՛ տղամարդիկ հաճախ մտածում են, որ սեռական հարաբերություն ունենալով` կարող են որևէ կերպ վնասել երեխային: Հարկ է նկատել, որ զարգացող պտուղը գտնվում է արգանդում՝ պաշտպանված ամնիոտիկ հեղուկով (պտղաջրեր) և արգանդի ուժեղ մկաններով: Այսպիսով, սեռական ակտիվությունը չի ազդում երեխայի վրա, եթե չկան այնպիսի բարդություններ, ինչպիսին, օրինակ, ընկերքի հետ կապված խնդիրներն են: Մնացյալ դեպքերում հղիության ժամանակ սեքսով զբաղվելը ոչ միայն անվտանգ է, այլև օգտակար:
-Այդ դեպքում ի՞նչ առավելություններ այն կարող է ունենալ:
-Սեռական հարաբերությունը կարող է թեթևացնել ցավն ու անհանգստությունը: Օրգազմի ժամանակ արտադրվող նյութերը դրական են ներգործում կնոջ օրգանիզմի վրա: Օրինակ՝ օքսիտոցին հորմոնը բարձրացնում է հանդուրժողականությունը ցավի նկատմամբ, մեղմվում են մեջքի և հղիության հետ կապված այլ բնույթի ցավերը: Այն բարելավում է նաև քունը և բարձրացնում տրամադրությունը, ուժեղացնում սիրո և ուրախության զգացմունքները՝ ավելի մերձեցնելով զուգընկերոջ հետ: Այն մասին, թե ինչ հաճախականությամբ է կարելի սեռական հարաբերություններ ունենալ հղիության ընթացքում, հստակ ցուցումներ չկան: Այստեղ կարևորը միայն փոխադարձ հաճույքն ու հարմարավետության զգացումն են:
-Իսկ ինչպե՞ս է փոխում կնոջ վերաբերմունքը սեքսի հանդեպ հղիության տարբեր եռամսյակներում:
-Առաջին եռամսյակում կարող է դիտվել սեռական ցանկության նվազում: Հնարավոր է, որ նախկինում հաճելի թվացող հպումները նույնչափ հաճելի չլինեն կնոջ համար կամ նույնիսկ տհաճ դառնան։ Այս ամենը պայմանավորված է հորմոնալ փոփոխություններով, տոքսիկոզով, կրծքերի և սեռական օրգանների զգայունության փոփոխությամբ։ Երկրորդ եռամսյակում հիմնականում դիտվում են սեռական ցանկության բարձրացում և հեշտոցի նորմալ խոնավեցում: Վերջինն էլ ավելի դուրեկան և անցավ է դարձնում ներթափանցումը։ Երրորդ եռամսյակում կրկին կարող է դիտվել սեռական ցանկության նվազում՝ պայմանավորված քաշի ավելացմամբ, ցավերի առկայությամբ ու հոգեբանական լարվածությամբ։
-Ո՞ր սեքս-դիրքերն առավել հարմար կլինեն hղիների համար:
-Հղիության ընթացքում դիրքերի մեծ մասը կարելի է փորձել՝ գտնելով այդ պահին ամենից հարմարը։ Կարելի է առանձնացնել «կինը վերևից» կամ «կողք կողքի» դիրքերը։ Դրանց դեպքում որովայնը չի ճնշվում, և կնոջը տրվում է հնարավորություն՝ վերահսկելու ներթափանցման խորությունը, քանզի խորը ներթափանցումը կարող է և տհաճ լինել։
-Անհրաժե՞շտ է պաշտպանվել , թե՞ ոչ:
-Պետք է գնահատել հնարավոր սեռավարակների փոխանցման ռիսկը, ինչը կարող է լուրջ առողջական խնդիրներ առաջացնել և՛ հղիի, և՛ երեխայի մոտ: Անհրաժեշտ է խուսափել սեռական հարաբերության բոլոր ձևերից կամ անպայման օգտագործել պահպանակ, եթե զուգընկերը ակտիվ կամ վերջերս ախտորոշված սեռավարակ ունի:
-Ի՞նչ պարտադիր կանոնների պետք է հետևի զույգը և ուրիշ ո՞ր դեպքերում խուսափի սեռական հարաբերություն ունենալուց:
-Ինչպես մինչ հղիությունը, այնպես էլ հղիության ընթացքում, անհրաժեշտ է հիշել փոխադարձ համաձայնության մասին և, բնականաբար, հետևել հիգիենայի կանոններին։ Հղիության ընթացքում հարկավոր է խուսափել սեռական հարաբերություն ունենալուց ներքոնշյալ դեպքերում.
․ նախկինում ունեցած վիժում
․ վաղաժամ ծննդաբերության վտանգ
․ հեշտոցային անբացատրելի արյունահոսություն
․ ամնիոտիկ հեղուկի (պտղաջրերի) արտահոսք
․ արգանդի վզիկի վաղաժամ բացում (արգանդի վզիկի անբավարարություն)
․ առաջադիր պլացենցա (ընկերք)
․ բազմապտուղ հղիություն
-Ծննդաբերությունից հետո որքա՞ն ժամանակ անց կարելի է կրկին սեքսով զբաղվել:
-Խորհուրդ է տրվում ծննդաբերությունից հետո սպասել առնվազն վեց շաբաթ՝ նախքան հեշտոցային հարաբերություն ունենալը:
-Նորմա՞լ է կնոջ՝ սեռական կյանքի նկատմամբ հետաքրքության կորուստը ծննդաբերությունից հետո, և ինչպե՞ս կարելի է այն վերականգնել:
-Այո՛, նորմալ է: Հոգնածության, կրծքով կերակրման, ցավի կամ հետծննդաբերական դեպրեսիայի պատճառով կանայք կարող են չունենալ նույն ցանկությունն ու զգացողություններն, ինչ հղիությունից առաջ։ Ծննդաբերությունից հետո հանդիպում է նաև ցավը հեշտոցային ներթափանցման ժամանակ: Պարզապես կրծքով կերակրելիս էստրոգենի և տեստոստերոնի մակարդակները նվազում են, ինչի արդյունքում էլ առաջանում է հեշտոցի չորություն և անբավարար խոնավեցում: Այս պարագայում կարելի է օգտագործել լյուբրիկանտներ՝ խոնավեցնող գելեր։ Ընդհանրապես, ճիշտ կլինի զուգընկերոջ հետ անկեղծորեն խոսել կարիքների, զգացողությունների և մտահոգությունների մասին: Եթե սեքսը անհրապույր կամ ոչ հաճելի է, փորձեք գրկախառնվել, համբուրվել կամ մերսել միմյանց:
Հեղինակ՝ Լուիզա Աբրահամյան