Հղիության մասին լուրը Ինչպես ուրախություն, այնպես էլ շփոթմունք է առաջացնում անգամ այն տղամարդկանց մոտ, որոնք վաղուց են այդ մասին երազել: Ապագա հայրիկի գլխում բազմաթիվ հարցեր են առաջանում. «Կկարողանա՞մ արդյոք լավ հայր լինել», «Կկարողանա՞մ ապահովել ընտանիքիս», «Կկարողանա՞մ արդյոք հոգ տանել երեխայի մասին»:
Սակայն այդ ամենը` միայն առաջին րոպեներին: Հետո ինքնավստահությունը նորից կվերականգնվի:
Մի՛ զարմացեք, եթե Ձեր կնոջ վարքը կտրուկ փոփոխվի: Նախկինում տրամաբանող և հանգիստ էակը հիմա կարող է առանց պատճառի լացել, հուզվել, նյարդայնանալ: Սիրելի տիկնոջ անսովոր ու փոփոխական վարքագիծը տեսնելով` ակամայից հարց է առաջանում. «Ինչպե՞ս պահել քեզ, երբ կինդ հղի է»:
Սիրելիի տրամադրության կտրուկ փոփոխությունները սրտին մոտ մի՛ ընդունեք: Այժմ նրա ներսում տարբեր ու հակասական զգացմունքների բուռն պայքար է: Դա անցողիկ է, և շուտով դուք այդ ամենը ժպիտով կհիշեք: Իսկ առայժմ համբերությամբ զինվեք, չէ՞ որ Ձեր կինն ուշադրության և սատարման կարիք ունի:
Առաջին և հիմնական խորհուրդն ապագա հայրիկներին. եղե՛ք որքան հնարավոր է ուշադիր և հոգատար: Դա այնքան էլ դժվար չէ, անգամ եթե դուք շատ զբաղված մարդ եք: Մայրիկի դրական էմոցիաները լավ են ազդում երեխայի զարգացման վրա: Կարող եք, օրինակ, առավոտյան 10 րոպե շուտ արթնանալ և սիրելիի համար թեթև նախաճաշ պատրաստել:
Մի՛ եղեք էգոիստ. երեխային կրելը և նրա մասին հոգալը միայն մայրիկի պարտավորությունը չէ: Օգնե՛ք կնոջն ինչով կարող եք:
Եթե կինը բնազդաբար գիտի, թե ինչպես պետք է լավ մայրիկ լինել, ապա դուք դեռ պետք է սովորեք լավ հայրիկ լինել: Ապագա հայրիկը կարող է մինչև երեխայի ծնունդը սկսել շփումը երեխայի հետ: Շոյեք կնոջ փորիկը, պատմեք նրան, թե ինչ է նրան սպասվում, ինչեր եք անելու նրա ծնվելուց հետո, թե ինչ գեղեցիկ ու սիրող մայրիկ ունի: Փոքրիկն այդպես կճանաչի նաև հայրիկի ձայնն ու փաղաքշանքները:
Հիանալի կլինի, եթե Դուք և Ձեր կինը հաճախեք ապագա ծնողների համար նախատեսված դասընթացների: Փորձառու մասնագետները կօգնեն ձեզ պատրաստվել կյանքի ամենակարևոր իրադարձությանը և կպատասխանեն Ձեզ հուզող հարցերին: