Ինչպե՞ս ճիշտ կազմակերպել նորածնի խնամքը. մաս 2  

Խնամք

 Երեխայի ճիշտ խնամքը կյանքի առաջին օրերին շատ կարևոր նշանակություն ունի նրա հետագա բնականոն զագացման ու աճի համար։ Իսկ փոքրիկի խնամքի, հիգիենայի ճիշտ կազմակերպման սկզբունքները կներկայացնի մանկաբույժ Նաիրա Առաքելյանը։

  

-Ինչպե՞ս ճիշտ կազմակերպել փոքրիկի լոգանքը։

 

Երեխայի լոգանքը պետք է կազմակերպել տաք սենյակում, շատ կարևոր է հաշվի առնել անվտանգության պայմաններն ու հարմարավետությունը։

Փոքրիկին լողացնելու համար պետք է ունենալ առանձին մանկական տաշտակ, որը այլ դեպքերում չի կարելի օգտագործել։ Լոգանքից առաջ մայրիկը պետք է պատրաստի աշխատանքային մաքուր տարածք, որտեղ կարելի է դնել փոքրիկի խնամքի միջոցները, նրա սրբիչն ու մաքուր շորերը:

Երեխային լողացնում ենք 37-38 աստիճան տաքությամբ ջրում։ Լոգանքի ժամանակ կարելի է օգտագործել մանկական օճառ կամ լոգանքի գելեր. իհարկե ցանկալի է, որ այդ միջոցները լինեն չեզոք՝ չպարունակեն հիմնային նյութեր: Առանց բժշկի իմացության, նաև արգելվում է ջրի մեջ լցնել տարբեր խոտաբույսեր ու անտիսեպտիկ միջոցներ: 

 

՞նչ հերթականությամբ ենք լվանում փոքրիկի մարմնամասերը։

 

Երեխայի լոգանքը պետք է սկսել աչքերը լվանալուց։ Աչքերը լվանում ենք մաքուր ջրի մեջ թրջած բամբակների միջոցով՝ ներսից դուրս ուղղությամբ: Յուրաքանչյուր աչքի համար պետք է օգտագործել առանձին բամբակ: Հետո պետք է լվանալ փոքրիկի դեմքը, ականջների արտաքին հատվածը և վզի տակ գտնվող շրջանը:

Ապա լվանում ենք երեխայի թևատակերը ու փորի շրջանը, աճուկային շրջանն ու սեռական օրգանները: Լոգանքը շարունակում ենք՝ լվանալով մեջքի և ոտքերի հատվածները:

Իսկ երեխայի գլուխը ցանկալի է լվանալ վերջում, որպեսզի խուսափեք լոգանքի ընթացքում երեխայի անհանգստությունից:

 

-Ինչպե՞ս չորացնել փոքրիկի մարմինը։

 

 Լոգանքից անմիջապես հետո փոքրիկին պետք է մանրակրկիտ չորացնել։ Երեխային չորացնում ենք փափուկ սրբիչով՝  այն թեթևակի հպելով մաշկին: Չի կարելի սրբիչով շփել երեխայի մաշկը, քանի որ այն շատ նուրբ է ու զգայուն: Շատ ուշադիր պետք է լինել մարմնի ծալքերը չորացնելիս, քանի որ հենց այս հատվածում են «սիրում հավաքվել» մանրէները։

Իսկ երեխայի պորտիկը պետք է խնամել մանկաբույժի ցուցումների համաձայն՝ մաքրելով այն ախտահանված բամբակով։

Եթե երեխայի մաշկը շատ զգայուն է, լոգանքից հետո կարելի է օգտագործել մանկական ցանափոշի, իսկ չոր մաշկի դեպքում՝ մանկական յուղեր։

 

-Ինչպե՞ս ճիշտ խնամել նորածնի եղունգները։

Նորածնի եղունգները ևս հատուկ խնամք են պահանջում, դրանք պետք է կտրել շատ նուրբ ու զգույշ, ցանկալի է այն ժամանակ, երբ  փոքրիկը քնած է։ Օգտագործեք հատուկ մանկական մկրատ, որի սայրերը կլինեն կլորավուն ու սուր։ Հետագայում եղունգների սերտաճումից խուսափելու համար դրանք պետք չէ կտրել շատ խորը։ Ձեռքի եղունգները պետք է կտրել կլորավուն, իսկ ոտքի եղունգները՝ ուղիղ անկյուններով։

 

Արփինե Մուրադյան

Գովազդ