Ցանկալի է երեխային դեռ նորածնային հասակից սովորեցնել ինքնուրույն քնել: Երբեմն երեխային դրեք մահճակալը, երբ դեռ արթուն է, թող փորձի ինքնուրույն քնել: Գիշերն աշխատեք երեխային ձեր անկողին չտանել, բայց հարկ եղած դեպքում ինքներդ մոտեցեք նրան:
Երեխային պառկեցնելով` դուրս եկեք սենյակից: Եթե երեխան վեր է թռչում, նրան նորից պառկեցրեք և ասեք, որ քնելու ժամն է: Եթե ձեր գնալուց հետո երեխան վեր է կենում ու սկսում լացել, նրան նորից պառկեցրեք և ասացեք. «քնելու ժամն է»:
Դուք կարող եք նստել փոքրիկի կողքին, մինչև որ նա կքնի: Սակայն ամեն երեկո աստիճանաբար մեծացրեք հեռավորությունը: Օրինակ, առաջին գիշերը նստում եք մահճակալին, երկրորդ գիշերը` մահճակալի կողքի աթոռին, երրորդ օրը` սենյակի անկյունում դրված աթոռին և այդպես շարունակ: Աստիճանաբար կհայտնվեք դռան արանքում, ապա հարևան սենյակում:
Փորձեք երեխային քնելու պառկեցնել սովորականից մի փոքր ուշ, որպեսզի նա հոգնած լինի և շուտ քնի: Սակայն աստիճանաբար քնելու ժամը տասնհինգ րոպե առաջ գցեք, մինչև կհասնեք նախընտրելի ժամին:
Այսպիսով, որպեսզի օգնեք երեխային քնել, կարող եք կիրառել հետևյալ մեթոդները.
- Քնելու ժամ սահմանեք և աշխատեք հետևել դրան: Նկատեք հոգնածության նշանները: Եթե պահը բաց թողնեք, երեխան էլի կակտիվանա ու ստիված կլինեք հանգստացնել նրան:
- Քնելու գնալու կարգ սահմանեք: Թող այդ ծեսը կարճատև լինի:
- Ընտրեք մեկ-երկու խաղ, որ սիրելի է ձեր փոքրիկին և դրանք էլ կարող են լինել քնից առաջ կատարվող ծիսակարգային խաղեր
- Կարելի է փոքրիկին տալ փափուկ խաղալիք, որը կասոցացվի քնի հետ
- Երեկոյան լոգանքի կամ լվացվելու պահին երեխային հնարավորություն տվեք, որ խաղա ջրով:
Անուշ քուն ու բարի երազներ ձեզ ու ձեր մանկիկին:
Այս թեմայով կարդացեք նաև`
Պատրաստվում ենք քնին: Ինչպե՞ս օգնել մանկիկին քնել
Գիշերային վերկացներ: Ինչպե՞ս օգնել մանկիկին քնել
Նյութն ըստ «Մեծացնում ենք փոքրիկին» ամսագրի
Հեղինակ` մանկական հոգեբան Սոֆյա Պոզդնյակովա