«Եղե՞լ է, արդյոք հղիություն, եթե թեսթը թույլ դրական է ցույց տվել, բայց հետո դաշտանը սկսվել է». «Իմ փոքրիկ»-ին ուղղված այս եւ մյուս հարցերի պատասխանները 

Հարց/Պատասխան

Հարցերին պատասխանում է «Շենգավիթ» ԲԿ-ի մանկաբարձ֊-գինեկոլոգ Գայանե Մնացականյանը:

 

Անուն: Անի

Հարց: Բարև Ձեզ, հարաբերություն եմ ունեցել, մեկ օր հետո դաշտան է սկսվել: Ասեք, խնդրում եմ, հնարավոր է՝ հղիություն  լինի:

Պատասխան: Հնարավոր չէ, եթե դաշտանից հետո հարաբերություն չի եղել:

 

Անուն: Ոսկի

Հարց: Բարև Ձեզ: Բժիշկ, հղիությանս մասին իմացել եմ նախքան դաշտանի օրը, ե՞րբ կարող եմ գնալ հետազոտման:

Պատասխան:   Սպասեք՝ ենթադրյալ դաշտանից սպասեք անցնի ևս 2-3 շաբաթ:

 


Անուն: Անուշ


Հարց: Բարև Ձեզ, 5 ամիս է՝ ամուսնացած եմ, առաջին ամսում ունեցել եմ դաշտանի ուշացում, հղիության 2 թեսթերն էլ ցույց են տվել դրական թույլ գծեր, սակայն 2 օր հետո թեսթը բացասական պատասխան ցույց տվեց, դրանից հետո էլ սկսվեց դաշտան: Նույնը տեղի է ունեցել 3-րդ ամսում: Արդյոք եղե՞լ է հղիություն և վաղաժամ վիժում: Ի՞նչ կարող է սա նշանակել: 

Պատասխան: Ասել, որ եղել է հղիություն, չի կարելի: Դաշտանի ուշացումը և թույլ դրական թեսթը դեռ հղիության նշան չեն:

 

Անուն: Աննա

Հարց: Հարգելի բժիշկ, ես 32 տարեկան եմ, ամուսնացած չեմ: Մեկ տարի առաջ ինձ մոտ հայտնաբերվեց ձվարանի կիստա, երկու ամիս դեղորայքային բուժում եմ կատարել՝ ըստ բժշկի ցուցումների, սակայն՝ ապարդյուն: Խնդրում եմ՝ պատասխանեք՝ կարո՞ղ է այս ընթացքում ձվարանի վնասում եղած լինի, հետագայում լուրջ խնդիրների առջև կանգնեմ: Կիստայի չափսը՝ 4.2 սմ: 

 Պատասխան: Նախ՝ պետք է պարզել կիստայի բնույթը (ֆոլիկուլյար, դերմոիդ, էնդոմետրոիդ…), կան կիստաներ, որոնց բուժումը բացառապես վիրակատական է:

 

Անուն: Ռուզաննա

Հարց: Բարև Ձեզ, ինձ մոտ այս պահին 26 շաբաթական հղիություն է, վերջին դաշտանս 2017 թվականի հուլիսի 25-ին էր, խնդրում եմ՝ ասեք՝ ե՞րբ է ծննդաբերության վերջին ժամկետը: Կանխավ շնորհակալություն:


Պատասխան: Մինչև մայիսի 1-ը:

 

Անուն: Անանուն

Հարց: Բարև Ձեզ: Արդեն մեկ շաբաթ է՝ ունեմ մենստրուացիայի նման ցավեր, թեթև անգույն արտադրություն ու անընդհատ ձայներ  ու շարժ եմ զգում որովայնումս, նաև կտրուկ փոփոխվող ախորժակ ունեմ: Այսօր եղել եմ գինեկոլոգի մոտ, հետազոտեց և ասաց, որ գինեկոլոգիական տեսանկյունից ամեն ինչ լավ է: Խնդրում եմ՝ ասեք՝ ի՞նչ կարող է լինել սա:  Նշեմ, որ վերջին մենստրուացիան եղել է 21 օր առաջ: Կանխավ շնորհակալ եմ:

Պատասխան: Նշեք վերջին դաշտանը: Օվուլյացիայի օրերին է նման բան հնարավոր:

 

Անուն: Սաթեն

Հարց:  Բարև Ձեզ, 14 շաբաթական հղի եմ, սակայն փորս ավելի փոքր է, քան նախորդ 2 շաբաթներում: Դա վտանգավո՞ր է:

Պատասխան: Եթե սոնոգրաֆիկ պտուղը համապատասխան է ժամկետին, անհանգստանալ պետք չէ: