«Օրգազմ չապրելը կարո՞ղ է կապ ունենալ անպտղության հետ»․ պատասխանում է մասնագետը

Հարց/Պատասխան

Գինեկոլոգ-ռեպրոդուկտոլոգ Ռուզաննա Ճզմաչյանը պատասխանել է «Իմ փոքրիկ»-ի ընթերցողների հարցերին:

 

Անուն՝ Օվսաննա

Հարց՝ Բարև Ձեզ: Ամուսնացած եմ 1 տարի 3 ամիս: Այդ ողջ ընթացքում փորձել եմ հղիանալ բնական եղանակով, սակայն չի ստացվել: Դաշտանային ցիկլս նորմալ է՝ 27 օրը մեկ: Միայն երկու անգամ  եմ ունեցել ուշացում, այն էլ չորս օրով: Միգուցե խնդի՞ր ունեմ:

Պատասխան՝ Անպտղություն է համարվում մեկ տարվա ընթացքում կանոնավոր սեռական հարաբերությունների արդյունքում հղիության բացակայությունը: Այնպես որ խորհուրդ եմ տալիս լինել ավելի զգոն և գիտակցել՝ ժամանակն է դիմել բժշկի:

 

 

Անուն՝ Ալլա

Հարց՝ Ինչպե՞ս իմանալ հղիության հավանական օրերը:

Պատասխան՝ Գոյություն ունեն օվուլյացիայի թեստեր, որոնց միջոցով կարող եք մոտավորապես իմանալ Ձեր օվուլյացիայի օրերը, որոնք էլ հենց հղիանալու համար ամենաբարենպաստ օրերն են:

 

 

Անուն՝ Անուշ

Հարց՝ Բարև Ձեզ: Ծննդաբերության արդյունքում ունեցել եմ բազմաթիվ կտրվածքներ և բավականին երկար ժամանակ՝ երկու ամիս ապաքինվել, քանի որ հետծննդյան շրջանում եղել է կարերի պատռվածք: Ծննդաբերությունից, ընդհանուր առմամբ, անցել է երեք ամիս մեկ շաբաթ, սակայն  սեռական ակտի ընթացքում զգում եմ ցավ հեշտոցի հատվածում: Հնարավո՞ր է, որ դա կտրվածքների ու պատռվածքների սպիների հետևանքը լինի, թե՞ այլ խնդիր կունենամ: Որովայնի շրջանում ցավեր չունեմ:

Պատասխան՝ Իհարկե, ցավը կարող է լինել սպիներից, բայց ամեն դեպքում խորհուրդ եմ տալիս դիմել գինեկոլոգի, որպեսզի բացառվեն մնացած բոլոր հնարավոր պատճառները:

 

 

 

 

Անուն՝ Անաիս

Հարց՝ Հարգելի՛ բժիշկ, նորմալ է արդյո՞ք ծննդկանի ախորժակի անփոփոխ լինելը:

Պատասխան՝ Այո՛, կարող է նաև այդպես լինել:

 

 

 

 

Անուն՝ Վիկա

Հարց՝ Բարև Ձեզ: Ինձ մոտ այժմ հղիության հինգերորդ շաբաթն է: Մեկ շաբաթ է՝  նկատել եմ սպիտակ կաթնային արտադրություն հեշտոցից: Ինչի՞ ախտանիշ կարող է այն լինել:

Պատասխան՝ Սովորաբար դա լինում է հեշտոցի սնկային ախտահարման ժամանակ, որը հաճախ է հանդիպում հղիության ընթացքում: Պետք է հանձնել քսուք, ինչից հետո ավելի ստույգ կլինի` որն է պատճառը:

 

 

 

 

Անուն՝ Մերի

Հարց՝ Ես 19 տարեկան եմ, ամուսինս՝ 24: Երկու տարի է, որ ամուսնացած ենք: Ամուսինս ունի երակի լայնացում: Ցանկանում եմ իմանալ՝ ինչպե՞ս է կատարվում արտամարմնային բեղմնավորումը և  ի՞նչ արժե:

Պատասխան՝ Սկզբից պետք է հանձնել սերմի անալիզ, որովհետև այդ դեպքում միշտ չէ, որ սերմի անալիզը վատ արդյունք է տալիս:

 

 

 

 

Անուն՝ Աննա

Հարց՝ Կնշե՞ք այն հորմոնները, որոնք առնչվում են չհղիանալու հետ:

Պատասխան՝ Քանի որ կնոջ ողջ հորմոնային համակարգը փոխկապակցված է, սխալ է առանձնացնել կոնկրետ հորմոններ: Պետք է կատարել կոմլպեքս հետազոտություն՝ հաշվի առնելով կնոջ անամնեստիկ տվյալները:

 

 

 

 

 

Անուն՝ Անահիտ

Հարց՝ Ունեի անգանդի միոմա, որը հեռացվել է, սակայն արգանդս չի հեռացվել: Ըստ ձեզ՝ կարո՞ղ եմ հղիանալ:

Պատասխան՝ Միանշանակ չի կարելի պատասխանել հարցին՝ առանց տեսնելու արգանդը: Շատ կարևոր է իմանալ արգանդի լորձաթաղանթի վիճակը, որից էլ կախված է հղիանալու հավանականությունը:

 

 

 

Անուն՝ Աշխեն

Հարց՝ Բարև Ձեզ: Ամուսանացած եմ մեկ տարուց ավելի, բայց դեռևս հղի չեմ: Այս ընթացքում ընդամենը 2-3 անգամ եմ օրգազմի հասել: Կարո՞ղ է դա չհղիանալու պատճառ լինել:

Պատասխան՝ Չի կարող:

 

 

 

Անուն՝ Միլենա

Հարց՝ Եթե ձվարանները հեռացված են, բայց երբեմն արյուն է լինում՝ 2-3 ամիսը մեկ,  հղիանալու հավանակությունը շա՞տ քիչ է:

Պատասխան՝ Եթե երկու ձվարաններն էլ հեռացված են, ապա հղիանալու հնարավորություն չկա:

 

 

 

Անուն՝ Տաթև

Հարց՝ Հարգելի՛ բժիշկ, մտավախություն ունեմ, որ երբ հղիանամ, ցիտոմեգալովիրուսի տիտրերը կբարձրանան և կրկին կկորցնեմ փոքրիկիս: Կարո՞ղ է լինել նման բան:

Պատասխան՝ Եթե արդեն բուժում ստացել եք վիրուսի դեմ, ապա վախենալու բան չկա: Հետազոտվեք վիժման այլ պատճառներ հայտնաբերելու համար, դրանք բավականին շատ են:

 

 

 

 

Անուն՝ Աննա

Հարց՝ Ութ տարի է՝ ամուսնացած եմ, ունեմ 5 տարեկան աղջիկ, երկրորդ երեխա ունենալ չեմ կարողանում: Խնդրում եմ ասել՝ հնարավո՞ր է, որ միզապարկի և երիկամի բորբոքումը խոչընդոտի հղիությանը:

Պատասխան՝ Ո՛չ, դա անպտղության պատճառ չի կարող դառնալ: