Մանկաբարձ-գինեկոլոգ, սոնոգրաֆիստ Աննա Խաչիկյանը պատասխանել է «Իմ փոքրիկ»-ի ընթերցողների հարցերին։
Անուն` Մարիամ
Հարց` Բարև Ձեզ: Հարգելի՛ բժիշկ, մոտ մեկ ամիս առաջ տեղադրել եմ ներարգանդային պարույր: Դրանից հետո եղել է դաշտան, որի ընթացքում արյունային արտադրությունը սովորականից առատ էր: Անընդհատ զգում եմ ծակող բնույթի ցավեր ու անհարմարություն։ Ինչու՞ և ի՞նչ անել: Հավելեմ, որ տեղադրումից հետո սեռական հարաբերություն չի եղել:
Պատասխան՝ Նման դրսևորումները կարող են լինել նորմալ, եթե նկատվեն մինչև երրորդ ամիսը: Մյուս դեպքերում դիմեք բժշկի, հատկապես եթե սեռական հարաբերության ժամանակ զգաք անհարմարավետություն:
Անուն` Լիլիթ
Հարց` Վեց ամիս առաջ ծննդաբերել եմ, մինչ օրս դաշտան չեմ տեսել: Արդյո՞ք որևէ խնդիր կա:
Պատասխան՝ Եթե կրծքով կերակրող եք, ապա խնդիր չկա:
Անուն` Անի
Հարց` Բարև Ձեզ: Դաշտան եղել է փետրվարի սկզբին, տևել է 4 օր, ամեն ինչ կարգին էր: Բայց հիմա առկա է շագանակագույն արտադրություն: Ինչո՞վ դա պայմանավորված կլինի:
Պատասխան՝ Տարբեր պատճառներ կարող են լինել, խորհուրդ կտամ անցնել փոքր կոնքի օրգանների ուլտրաձայնային հետազոտություն:
Անուն` Անի
Հարց` Հարգելի՛ բժիշկ, դաշտանի բացակայության դեպքում հնարավո՞ր է հղիություն: Նշեմ՝ կրծքով կերակրող մայրիկ եմ, բալիկս արդեն վեց ամսական է և ցիկլս դեռ չի վերսկսվել: Նախապես շնորհակալ եմ:
Պատասխան՝ Այո՛, հնարավոր է:
Անուն` Վարդուհի
Հարց` Բարև Ձեզ: 3,5 տարի առաջ տեղադրել եմ ՆԱՊ, այդ տարիների ընթացքում երկու անգամ ստացել եմ բուժում` բորբոքման համար: Հիմա նկատում եմ շագանակագույն արտադրություն, իսկ դեմքիս առաջացել են կորյակներ: Խնդրում եմ ասել` ինչի՞ց կարող են լինել:
Պատասխան՝ Առաջին հերթին պետք է պարզել ՆԱՊ-ի կարգավիճակը, դիրքը, կատարել սոնոգրաֆիա: Մաշկի հետ կապված խնդիրները նույնպես կարող են ունենալ մի քանի աղբյուր՝ հորմոնալ, աղիքային, բակտերալ և այլն: Դա ևս պետք է հստակ ախտորոշել:
Անուն` Մարիամ
Հարց` Բարև Ձեզ, մոտ 20 օր առաջ տեղադրել են ՆԱՊ: Սկզբում բողոքներ չկային, սակայն 3 օր կլինի` ձախ ձվարանի շրջանում ցավ եմ զգում, մի փոքր մրսելուց հետո ցավն ուժեղանում է։ Կարծես դաշտանային ցավեր լինեն, զուգակցվում են քիչ քանակի արյունային արտադրությամբ։ Ինչպե՞ս վարվել: Եթե կարևոր է, նշեմ` ծննդաբերություն ունեցել եմ բնական ճանապարհով։ Նախապես շնորհակալություն:
Պատասխան՝ Ցավերը կարող են կապ չունենալ ներարգանդային պարույրի հետ: Դիմեք բժշկի, անցեք փոքր կոնքի օրգանների ուլտրաձայնային հետազոտություն:
Անուն` Շողեր
Հարց` Հղիության 26 շաբաթական ժամկետում կարելի՞ է «Կլեկսան» ներարկել, եթե ֆիբրինոգենի ցուցանիշը 577 է:
Պատասխան՝ Կոնկրետ սա ճիշտ կլինի քննարկել արյունաբանի հետ: