Ինչպե՞ս հաղթահարել բարկությունը և չբղավել երեխայի վրա․ հոգեբանը հատուկ մեթոդներ է ներկայացնում

Դաստիարակություն

Լինում են պահեր, երբ կենցաղային, աշխատանքային ու ընտանեկան խնդիրները գումարվում են միմյանց, ու ծնողները կորցնում են համբերությունը՝ հաճախ զայրույթը թափելով երեխաների վրա։ Հնարավո՞ր է, արդյոք, այդ պահերին զսպել պոռթկումը և չբարկանալ երեխայի վրա:

«Ժեստ» հոգեբանական կենտրոնի հոգեբան Անի Ապիտոնյանը հավատացնում է՝ հնարավո՛ր է: «Առաջին կարևոր կետը վերաբերմունքն է։ Ծնողները երբեմն սխալ են դասավորում կյանքի տարբեր ոլորտները, ինչի արդյունքում խնդիրների մի ամբողջ կույտ է ձևավորվում: Հարկավոր է դարակներում տեղավորել յուրաքանչյուր խնդիր: Երեխայի հետ կապված խնդիրները վերաբերում են միայն երեխային, ընտանիքի այլ անդամի հետ կապված խնդիրը վերաբերում է միայն այդ անդամին, աշխատանքային խնդիրները մնում են աշխատավայրում: Շատ կարևոր է ունենալ այս ընկալումը, որ հուզական այրում չառաջանա, և մարդը կարողանա իր խնդիրները լուծել հերթով և շարքով: Նաև կարևոր է գիտակցումը, որ եթե երեխան ունի խնդիրներ, ծնողները պիտի աջակցեն նրան»,-նշում է հոգեբանը: 

Հոգեբանի կարծիքով՝ պետք չէ բարկությունը զսպել, որովհետև, ինքներս մեզ զսպելով, մենք կուտակում ենք հույզերը և ավելի բուռն արձագանք տալիս: Փոխարենը Անի Ապիտոնյանը ծնողներին խորհուրդ է տալիս ամենալարված պահերին շնչառական վարժություններ կատարել: 

«Ծնողները կարող են կատարել շնչառական վարժություններ, որոնք հանգստացնում են ամբողջ օրգան-համակարգը, հանգստացնում են նյարդերը, մարմնին բերում են հանգստություն, և մարդը կարող է մեկ շնչառական վարժությամբ հանգստանալ և ավելի օբյեկտիվ արձագանք տալ իրադրությանը»,-նշում է Ապիտոնյանը:

Հոգեբանի խոսքով՝ շնչառական վարժությունները տարբեր են․ «Վարժություններից մեկն, օրինակ, պետք է իրականցվի դանդաղ. շնչում ենք քթով, շունչը պահում 4 վայրկյան և դանդաղ արտաշնչում բերանով: Այնուհետև հինգ վայրկյան կանգ ենք առնում, սպասում, որ գլխապտույտ չառաջանա, ապա ևս 2 անգամ կատարում այդպիսի շնչառական պտույտ: Այս վարժությունից հետո մեծամասամբ ոչ մարդու բարկանալն է գալիս, ոչ, առավել ևս բղավելը, իսկ արյան շրջանառության ակտիվացման շնորհիվ մարդը կարողանում է ավելի ադեկվատ մտածել»,-ասում է նա:

Անի Ապիտոնյանը մի տարբերակ էլ է առանձնացնում բարկացած ծնողների համար: «Շատ լարված ժամանակ պետք է դուրս գալ տարածքից, հանգիստ, դանդաղ խմել 1 բաժակ ջուր, սառը ջրով լվանալ դեմքը, ձեռքերը, վզի հատվածը: Կարելի է նաև հետևյալ մեթոդը օգտագործել՝ լվացվելու ժամանակ կենտրոնանալ գործողությունների վրա. այդ ժամանակ հույզերը թուլանում են: Կարելի է փակել աչքերը և հաշվել մինչև 10-ը: Այս գործողությունների շնորհիվ մեր բարկությունը անցնում է, և մենք ավելի ճիշտ մոտեցում ենք ցուցաբերում խնդիրներին»,-ասում է հոգեբանը:

Անի Ապիտոնյանը ծնողներին խորհուրդ է տալիս այս մեթոդները փոխանցել նաև երեխաներին, որ նրանք փոքր տարիքից սովորեն՝ ինչպես կարելի է հանգստացնել մարմինը և հոգին ու դրանից հետո միայն ընդունել որոշումներ:

 

Հեղինակ՝ Նանե Ավետիսյան

Գովազդ