Ինչպե՞ս հարստացնել երեխայի ժամանցը. խաղի այլընտրանքային տարբերակներ

Ժամանց

Անձրևոտ եղանակին, երբ դրսում ցուրտ է, մայրիկները  հաճախ  դժվարանում են ապահովել փոքրիկի հետաքրքիր առօրյան։

Առաջարկում ենք մի քանի տարբերակ, որոնք կօգնեն ծնողներին զբաղեցնել փոքրիկներին՝ ապահովելով ուրախ և ակտիվ ժամանց։ 

  • Պատրաստել թեքահարթակներ 

Փոքրիկները` հատկապես տղաները, սիրում են խաղալ մեքենաներով։ Խաղն առավել հետաքրքիր դարձնելու համար երեխայի հետ միասին ստվարաթղթից ճանապարհներ պատրաստեք, ճանապարհային նշաններ նկարեք։ Հավատացեք՝ փոքրիկն իսկապես կզվարճանա: 

  • Բաժակներով խաղ 

Այս խաղի համար անհրաժեշտ են սովորական պլաստմասե բաժակներ։ Երեխաները դրանցով պետք է կառուցեն աշտարակներ և ամրոցներ այնպես, որ դրանք չփլուզվեն։ 

  • Սոդայի և քացախի գլուխգործոցը

Խաղի բանաձևն է ՝  սոդա+ քացախ = զվարճանք։ Դուք կարող եք այս եղանակով տարբեր փորձեր կատարել՝ օգտագործելով պլաստիլին, պլաստմասե խաղալիքներ։ Անհրաժեշտ է սոդան և քացախը խառնել իրար և պլաստիլինը նետել զանգվածի մեջ։ 

  • Ներկի՛ր քարերը 

Ժամանցի հեշտ և նույնքան հետաքրքիր տարբերակներից է քարերի ներկումը։  Հարկավոր է պարզապես քարեր հավաքել ու ներկել դրանք ջրաներկով, յուղամատիտով, որից հետո կարելի է պլաստիլինով պատկերել աչքեր, հոնքեր, բերան, ատամներ,  այն, ինչ փոքրիկը կցանկանա։ 

  • Window markers կամ պատուհանի մատիտներ

Window markers-ը զվարճանքի հիանալի տարբերակ է։ Դրանք սովորական մատիտներ են, որոնցով կարելի է ներկել պատուհանները։ Մի՛ անհանգստացեք՝ փոքրիկի ստեղծագործությունը հեշտությամբ կարելի է մաքրել խոնավ շորով։ 

  • Պարի'ր, եթե կարող ես 

Սա խաղ է, որի ընթացքում պետք է միացնել երաժշտությունը՝ պարբերաբար ընդհատելով այն։ Երաժշտությունն ընդհատելուն պես փոքրիկը պետք է կանգնի տեղում՝ դադարեցնելով ամեն տեսակի գործողություն, այլ կերպ ասած ՝ տեղում սառչի։ Խաղն ավելի հետաքրքիր է, երբ կան մեկից ավելի մասնակիցներ։ Հաղթում է այն մասնակիցը, ով կարողանում է ժամանակին «սառչել»։

 

Խորհուրդները հավաքել է Նորա Հայրապետյանը:

 

Գովազդ