Ինչպե՞ս է ընթանում կաթնատամներից անցումը հիմնական ատամներին և ի՞նչ խնդիրներ կարող են առաջանալ. պարզաբանում է մասնագետը

Խնամք

«Իմ փոքրիկ»-ը զրուցել է «France med»-ի մանկական ստոմատոլոգ Գոհար Անտոնյանի հետ։


Երեխայի մոտ անցումը կաթնատամներից հիմնական ատամների ինչպե՞ս է արտահայտվում, ինչի՞ն պետք է ուշադրություն դարձել:


- Երեխաների մոտ կաթնատամներից անցումը հիմնականի ամենակարևոր և ուշադրության արժանի ժամանակահատվածն է: Այն սկսում է մոտ 6-7 տարեկանում և ավարտվում է մոտ 12 տարեկանում: Կա թյուր կարծիք, թե 6-7 տարեկանում են փոխվում նաև ծամող կաթնատամները և ժամանակից շուտ հեռացվում են ինչ-ինչ պատճառներով, որը իր հերթին բերում է այլ խնդիրների: Պետք է հատուկ ուշադրություն դարձնել բերանի խոռոչի հիմնական՝ 6-րդ ատամներին, որոնք ծկթում են 5-6 տարեկանում: 

 

- Կաթնատամների փոփոխման փուլում երեխայի մոտ ի՞նչ խնդիրներ կարո՞ղ են առաջանալ:


- Կաթնատամների փոփոխման փուլում հիմնական խնդիրները օրթոդոնտիկ են` ծնոտի և ատամնաշարի հետ կապված: Դրանց բուժման համար պետք է դիմել արդեն ոչ թե մանկական ստոմատոլոգի, այլ փորձառու օրթոդոնտի:


Ատամիկների փոփոխության փուլում ինչպե՞ս ճիշտ խոզանակել ատամները:


- Այս փուլում խորհուրդ կտայի ձեռք բերել բերանի խոռոչի համար նախատեսված ողողիչներ (ցանկալի է բուսական ծագման) և ատամնաթելեր: Այս տարիքում շատ կարևոր է ոչ միայն խնամքը, այլև ճիշտ, ռացիոնալ սնունդը, քաղցրի չափաբաժնի կրճատումը: Իմ փորձը ցույց է տվել, որ հենց այս որոշիչ փուլում երեխաները դառնում են ավելի կամակոր, նրանց վերահսկելը և հիգիենային հետևելը ծնողների համար, մեղմ ասած, դժվար է դառնում: Այդ պատճառով կխնդրեմ ծնողներին, որ ստոմատոլոգի մոտ պրոֆիլակտիկ այցը լինի առնվազն 3-6 ամիսը մեկ:


Եթե նոր ատամ է դուրս գալիս, բայց նախկինը դեռևս իր տեղում է, ինչպե՞ս վարվել այդ դեպքում:


- Այս երևույթը մեր օրերում հաճախ է հանդիպում: Պետք է դիմել մոտակա ստոմատոլոգիական կլինիկա: Մասնագետի միջամտություն է անհրաժեշտ:

 
Երեխայի հիմնական ատամներն ի՞նչ միջոցներով խնամել:


- Կարևոր է պահպանել ամենօրյա հիգիենայի կանոնները, սննդային ճիշտ ռացիոնը: Կան նաև մի շարք պրոֆիլատիկ միջոցառումներ, օրինակ՝ ատամների մշտական հերմետիզացիան:


Արդյո՞ք պետք է փոքրիկին կալցիում տալ հաբերի տեսքով:


- Կալցիումը շատ կարևոր և անհրաժեշտ միկրոէլեմենտ է, որն իր ուրույն դերն է ունենում ոչ միայն ատամների, այլև ոսկրային, մկանային համակարգերի և այլ կենսական կարևոր օրգան համակարգերի համար: Այդուհանդերձ, մենք`ստոմատոլոգներս, առանց համապատասխան լաբարատոր քննության և հետազության, չենք կարող որոշուներ կայացնել և անել նշանակումներ:


Նախկինում ծնողները երեխաներին, օրինակ, ձվի կեղև էին տալիս՝ վստահ լինելով, որ այն հարստացնում է օրգանիզմը կալցիումով։ Ի՞նչ կասեք նմանօրինակ մեթոդների մասին։


-Կալցիումով հարուստ և առողջ սննդի ընդունումը մեր ծնողներին դեռ ոչ ոք չի արգելել, այն խրախուսվում է: Իսկ ինչ վերաբերում է նշված մեթոդին, կդժվարանամ որևէ կերպ արձագանքել:

 

 

 

Հեղինակ՝ Մոնիկա Մամյան

Գովազդ