Ինչպե՞ս հասկանալ, որ երեխան թունավորվել է և ի՞նչ անել

Խնդիրներ

1-ից 5 տարեկան երեխաների շրջանում թունավորումներն ավելի հաճախ են հանդիպում: Պատճառը պարզ է. այդ տարիքում երեխաները սովորություն ունեն ամեն ինչ փորձել, համտեսել: Սակայն պետք է հիշել, որ երեխաների թունավորումների պատճառը մեծահասակների անզգուշությունն է:

Վերջին շրջանում «Մուրացան» համալսարանական հիվանդանոցի թունաբանության և մանկական վերակենդանացման կլինիկայում հատկապես շատացել է դեղերով, էսենցիայով պայմանավորված թունավորումների դիմելիությունը:

Ծնողները պարտավոր են դեղերը, կենցաղային քիմիան պահել երեխաների համար անհասանելի վայրերում: 

Թունավորումները կարելի է կանխել, եթե ծնողները իրականացնեն կանխարգելման աշխատանքներ:


❌ Չի կարելի դեղը երեխաներին ներկայացնել որպես կոնֆետ կամ օշարակ: Ամենահաճախ հանդիպող դեղորայքային թունավորումները մեծահասակների սխալ մատուցման հետևանք են:
📍Թունավորման ախտանիշները կախված են թույնի տեսակից, քանակից և խտությունից, ինչպես նաև թունավորված մարդու տարիքից, մարմնի զանգվածից և ընդհանուր առողջական վիճակից:

Դեղորայքային թունավորման ժամանակ ամենահաճախ հանդիպող նշաններն են՝


• ինքնազգացողության վատացում,
• փսխումներ, եթե վնասվում է ստամոքսի լորձաթաղանթը,
• ցավեր ստամոքսի շրջանում,
• փորլուծություն,
• ջերմության անկում կամ բարձրացում:


📍Դեղորայքային թունավորման դեպքում 1-2 ժամվա ընթացքում տրվում է ակտիվացված ածուխ, ինչպես նաև լաբորատոր ցուցանիշներով վերահսկվում է լյարդի և երիկամների ֆունկցիան՝ տոքսիկ ազդեցությունից խուսափելու համար: Բժշկի կողմից գնահատվում է դեղորայքի չափաքանակն ու տեսակը, թե այն ինչ ազդեցություն կարող է ունենալ օրգանիզմի վրա՝ թեթևից մինչև ծանր:

❌ Քանի որ ստամոքսի լվացումը սթրեսային միջամտություն է, այդ մեթոդը հատկապես երեխաների դեպքում չի կիրառվում:

📍Եթե հնարավոր չէ շատ արագ երեխային հիվանդանոց հասցնել, «Մուրացան» համալսարանական հիվանդանոցում գործում է ☎️82-82 կարճ հեռախոսահամարը: Խորհուրդ է տրվում թունավորման դեպքում առաջին օգնության վերաբերյալ խորհրդատվություն ստանալու համար զանգահարել նշված համարով:

 

Աղբյուրը՝  «Մուրացան» համալսարանական հիվանդանոցային համալիր

Գովազդ