Ինչպե՞ս մերսել նորածնին

Մերսեք փոքրիկի գլուխը

Փոքրիկի գլուխը մերսել սկսելուց առաջ անպայման խորհրդակցեք մանկաբույժի հետ: Նորածին փոքրիկի գանգոսկրը դեռ փափուկ է, և գլխին պետք է զգույշ դիպչել: Գլխի մերսումները մանկաբույժի հետ խորհրդակցելուց հետո կարող եք սկսել, երբ արդեն գանգոսկրը պնդացել է:

• Մի ձեռքով  պահեք փոքրիկի գլուխը, մյուսով մերսեք նրա գլխամաշկը կարծես մազերին յուղ եք քսում:
• Կարող եք նաև մարմնի յուղ քսել մերսումից հետո կամ մերսման ընթացքում:
• Մեղմորեն մերսեք փոքրիկի ճակատը, գլուխը, այտերը, քիթը, կոպերը, բերանի շրջակայքը, ականջները:

Մերսեք վիզը

• Պարանոցը մեղմորեն մերսեք ներքևից դեպի վերև ուղղությամբ, իսկ վիզը մերսեք վերևից դեպի ուսերը:

Մերսեք թևերը

• Բռնեք մի թևը և զգուշորեն մերսեք ուսերից դեպի արմունկը, ապա մինչև դաստակը:
• Մերսեք նաև մատները` հերթականությամբ:
• Մերսեք նաև ձեռքի ափերը:
• Արմունկը մերսեք շրջանաձև շարժումներով:

Մերսեք փորը

• Փորի ճիշտ մերսումը փոքրիկին կազատի գազերից:  Մանկիկի փորը մերսեք ժամացույցի սլաքների ուղղությամբ`շրջանաձև շարժումներով:

Մերսեք ոտքերը

• Ոտքերը մերսեք ողջ ձեռքով`ազդրերից ոտնաթաթ ուղղությամբ:
• Սկզբում նրբորեն մերսեք ազդրերը:
• Մերսեք ոտնաթաթերը և ոտքի մատներն առանձին առանձին:
• Մերսեք նաև փոքրիկի ներբանը՝ կրունկից դեպի մատներն ուղղությամբ, կրունկները մերսեք շրջանաձև շարժումներով:
• Փոքրիկի ոտքերի մերսումը կարող է նպաստել, որ նա հեշտությամբ սովորի քայլել:

Մերսեք փոքրիկի մեջքը

Մեղմորեն փոխեք փոքրիկի մարմնի դիրքը և սկսեք մերսել նաև նրա մեջքը: Մերսումը սկսեք վզից դեպի ներքև ուղղությամբ:  Զգույշ եղեք փոքրիկի ողնաշարի դեպքում, դրա վրա որևէ ճնշում չպետք է գործադրել:

Փոքրիկին օրվա ընթացքում կարող եք մերսել մինչև երկու-երեք անգամ: Մերսումն օգնում է արագացնել փոքրիկի արյան շրջանառությունը, նրան  խաղաղ քուն է պարգևում: Շատ փոքրիկներ մերսումից քիչ անց հանգիստ քնում են, քանի որ այն հանգստացնում է մարմինը: Եթե փոքրիկին առավոտյան եք լողացնում, ապա մերսեք լոգանքից առաջ, իսկ երեկոյան՝ քնելուց մեկուկես ժամ առաջ:

Եթե փոքրիկն առողջական խնդիրներ ունի, մերսումներ սկսելուց առաջ անպայման խորհրդակցեք մանկաբույժի հետ: