Յուրաքանչյուր ծնող ցանկանում է անել ամեն ինչ, որպեսզի նպաստի իր երեխայի ներդաշնակ զարգացմանը։ Իսկ ինչպե՞ս օգնել նրան այդ հարցում։
13-17 ամսականում
- Անհրաժեշտ է շարունակել երեխայի խոսքի զարգացումը՝ կարդալով, խոսելով երեխայի առօրյայի մասին, անվանելով շրջապատի առարկաները, մշտապես ուշադրության արժանացնելով և գովելով երեխայի խոսելու փորձերը,
- հետևողականորեն պահպանեք երեխայի օրվա ռեժիմը։ Հարկ եղած դեպքում կտրուկ ասեք՝ «ոչ»,
- տվեք հասարակ խաղալիքներ, որոնք երեխան կարող է քանդել և նորից հավաքել,
- եթե երեխան ուսումնասիրելու նպատակով ջարդում է խաղալիքը, մի' բարկացեք,
- տվեք կափարիչներով պլաստմասե ամաներ, որպեսզի երեխան բաց և փակի դրանք,
- խորանարդիկներից աշտարակ կառուցեք։ Թող երեխան քանդի այն և փորձի նորից հավաքել,
- խաղալու համար անվտանգ միջավայր ապահովեք։ Որոշակի հսկողության պայմաններում թույլ տվեք երեխային քայլել, խաղալ գնդակով, հետաքրքրվել շրջապատով և ուսումնասիրել այն,
- երեխային ցույց տվեք, թե ինչպես կարելի է խաղալ զանազան խաղալիքներով,
- պետք է խրախուսել նմանակումը,
- մոր հետ սերտ կապից երեխան աստիճանաբար անցնում է դեպի որոշակի ինքնուրույնության։ Անցումային այս շրջանում կարևոր է երեխային հանգստացնող առարկաների դերը ( փոքր վերմակ, փափուկ խաղալիք)։
18-23 ամսականում
- Երեխայի սիրելի հեքիաթներում բաց թողեք կարևոր բառերը, որպեսզի երեխան լրացնի (արտասանելով) դրանք,
- տվեք երեխային այն խաղալիքները, որոնցով նախընտրում է խաղալ,
- թույլ տվեք երեխային թերթել և նայել որոշ գրքեր կամ ամսագրեր,
- նախօրոք տեղյակ պահեք երեխային, եթե մտադիր եք փոխել արդեն որոշված գործողությունները,
- եթե Ձեր փոքրիկը որևէ սխալ արարք է անում, բացատրեք, թե որն է սխալը,
- սահմանափակեք հեռուստացույց դիտելու ժամանակը։ Թույլ մի՛ տվեք, որ հեռուստացույցը դառնա Ձեր երեխայի «դայակը»,
- բառապաշարի հարստացման, խոսքի և լսելու ընդունակության զարգացման նպատակով պետք է քնելուց առաջ կանոնավոր գիրք կարդալ երեխայի համար,
- խրախուսեք ինչպես ակտիվ և հանգիստ, այնպես էլ նմանակող խաղերը,
- պետք է երեխային պարզ հանձնարարություններ տալ (օրինակ՝ հավաքել խաղալիքները),
- մի՛ մոռացեք գովել երեխային լավ վարքագծի համար,
- ընտրության հնարավորություն տվեք,
- խրախուսեք ինքնասպասարկման փորձերը:
Աղբյուրը՝ առողջապահության նախարարության «1-2 տարեկան երեխայի զարգացումը և դաստիարակման գաղտնիքները» ուղեցույց
