Սովորենք կերակրել փոքրիկին (մաս I)

Սնունդ

ԿԵՐԱԿՐԵՔ ՇՈՒՏ-ՇՈՒՏ ԵՎ ՔԻՉ-ՔԻՉ: Քանի որ փոքրիկի համար չկա ճաշ, նախաճաշ և ընթրիք, նրա համար նշանակություն չունի , թե ինչ հաջորդականությամբ կուտի բանջարեղենը, շիլան, մրգերը: Սխալ է կարծել, թե երեխան կարող է օրվա մեջ երեք անգամ հանգիստ նստել սեղանի մոտ և ուտել: Պետք է հրաժարվել փոքրիկին ռեժիմով կերակրելու մտքից  և ոչ մեծ քանակությամբ պինդ սնունդ տալ կրծքով կերակրելու ընդմիջումների  միջև: Չպետք է մոռանալ, որ երեխայի ստամոքսը փոքր է:

Երեխային պետք է կերակրել այն ժամանակ, երբ որևէ տեղ չեք շտապում: Փոքրիկներն ուտելիս դանդաղում են, կերակուրը քսում են հագուստին, լալիս, թափում և այլն: Պետք է այս ամենը հաշվի առնել, չշտապել և չշտապեցնել երեխային:

Կերակրելու արվեստում հաջողության հասնելու համար պետք է լավ իմանալ երեխայի տարիքային առանձնահատկությունները, հմտությունները, ունենալ մեծ համբերություն և ինքնատիրապետում:

ԿԵՐԱԿՐԵԼԻՍ ԽՈՍԵՔ ԵՐԵԽԱՅԻ ՀԵՏ: Կերակրելիս պետք է զրուցել երեխայի հետ, որպեսզի նա սովորի կապ ստեղծել խոսքի, առարկաների և գործողություններ միջև: Ծնողները երեխային որևէ  բանավոր  հրահանգ տալուն զուգնթաց կարող են կատարել այդ գործողությունը: Օրինակ` երբ փոքրիկը պետք է բերանը բացի, կերակրողը կարող է ինքը բացել իր բերանը. ու երեխան պարզապես կկրկնօրինակի նրան: Վառվռուն աչքերը. բացված ափերն ու բաց բերանը վկայում են, որ երեխան պատրաստ է, ուզում է ուտել:

ԿԱՐՈՂԱՑԵՔ ԺԱՄԱՆԱԿԻՆ ԱՎԱՐՏԵԼ: Սեղմված շուրթերը, փակ բերանը, գդալից խուսափելը խոսում են այն մասին, որ փոքրիկն ուտել չի ուզում: Չի կարելի նրան ստիպել: Երեխաների մի մասը պինդ սնունդ  հաճույքով է ուտում 4 ամսականից սկսած . մինչդեռ 9 ամսականից մինչև 1 տարեկան շատ երեխաներ քիչ են  հետաքրքրվում դրանով: Կարևորը ուտելիքի, ուտելու նկատմամբ ճիշտ վերաբերմունք դաստիարակելն է, իսկ ուտելիքի նկատմամբ անտարբերությունը շատ հեշտ բացատրություն ունի. փոքրիկն այդ պահին ուզում է խաղալ, քնել կամ պարզապես կուշտ է:

ՉԻ ԿԱՐԵԼԻ ՔՆԵԼՈՒՑ ԱՌԱՋ ՉԱՓԻՑ ԱՎԵԼԻ ԿԵՐԱԿՐԵԼ ԵՐԵԽԱՅԻՆ: Հաճախ, որպես լրացուցիչ սնունդ, խորհուրդ են տալիս երեխային կերակրել շիլայով, որպեսզի շշով կամ կրծքով կերակրելու  ընդմիջումները մեծանան: Շատ ծնողներ, կարծելով, որ կուշտ  երեխան ավելի լավ է քնում, գիշերային քնից առաջ կերակրում են: Այդպես  կերակրելու դեպքում ծագում է երկու խնդիր. երեխան վաղ հասակից կորցնում է հսկողությունն ախորժակի վրա, ձեռք է բերում ճարպակալելու հակում: Պետք է հիշել, որ երեխայի հիմնական սնունդը կրծքի կաթն է կամ սննդային խառնուրդը:  Հետազոտությունները ցույց են տալիս , որ կուշտ կերած երեխան բոլորովին էլ լավ չի քնում գիշերը չկերակրվող երեխայի համեմատությամբ:

 

«Մինչև մեկ տարեկան երեխայի խնամքը», Հայաստան, 2002թ.

Գովազդ