Պարետատան կանոնները՝ մանկապարտեզների գործունեության համար

Հայաստանի փոխվարչապետ, պարետ Տիգրան Ավինյանի որոշմամբ՝ սահմանվել են կրթության ոլորտի եւ մանկապարտեզների գործունեության համար կորոնավիրուսային հիվանդության տարածման կանխարգելման անվտանգության կանոններ:

Համաձայն որոշման՝ նախադպրոցական կրթության առողջ եւ անվտանգ պայմանների ապահովման պարտականությունն ամբողջ ծավալով կրում է հաստատության տնօրենը: Վարակի կանխարգելման ուղղությամբ աշխատանքներն իրականացվում են ըստ երկրում համաճարակային իրավիճակի զարգացման փուլերի: Ներկա փուլում կգործեն հետեւյալ կանոնները:

 

Հիմնական կանոններ

Հնարավորինս ձեռնպահ մնալ կորոնավիրուսի ծանր հիվանդության զարգացման բարձր ռիսկային խմբի աշխատողներին աշխատանքի ներգրավելուց: Բարձր ռիսկային խմբի մեջ ներառված են՝ թույլ իմունային համակարգ ունեցող անձինք, 65 տարեկան եւ բարձր տարիքի անձինք, քրոնիկ հիվանդություններ, շաքարային դիաբետ ունեցող անձինք եւ այլն: Բացառվում է երեխային ուղեկցող անձի մուտքը նախադպրոցական կրթական հաստատություն: Բացառվում են նախադպրոցական կրթական հաստատության շենքին հարակից տարածքներում մարդկանց կուտակումները: Հաստատություն հաճախող սաների ընդունումը եւ ճանապարհումն իրականացվում է հերթայնության կառավարմամբ (օրինակ՝ կարող են սահմանվել երեխաների՝ նախակրթարան գալու եւ գնալու ժամային միջակայքեր)՝ պահպանելով մարդկանց միջեւ 1.5-2 մետր սոցիալական հեռավորություն: Երեխաների խնամքի եւ կրթության գործընթացը պետք է կազմակերպել բեռնաթափված խմբերով՝ դրանք դարձնելով 10-12 հոգանոց եւ ապահովելով խաղալու, պարապմունքների, սննդի եւ քնի ժամանակ երեխաների միջեւ 1.5-2 մետր սոցիալական հեռավորություն։ Անհրաժեշտ է ժամանակավորապես սահմանափակել նախադպրոցական կրթական հաստատություն հաճախելիությունը՝ առաջնահերթություն տալով այն երեխաներին, որոնց տնային խնամքը գործնականում հնարավոր չէ ապահովել ծնողների կամ խնամակալների աշխատանքը հեռավար ձեւով կազմակերպելու անհնարինությամբ կամ այլ օբյեկտիվ հանգամանքներով պայմանավորված: Պետք է նախապես ցուցակագրել այն երեխաներին, որոնց ծնողները կամ խնամակալները երեխաներին նախակրթական հաստատություն ուղարկելու մտադրություն են հայտնել: Եթե երեխայի ծնողների (խնամակալների) շրջանում նախկինում հաստատվել է Կորոնավիրուսային հիվանդություն (COVID-19), կամ նրանք շփում են ունեցել նշված հիվանդությամբ հաստատված դեպքերի հետ եւ գտնվել են մեկուսացման կամ ինքնամեկուսացման մեջ, ապա առաջին անգամ ներկայանալիս այդ երեխաների ծնողների (խնամակալների) կողմից ներկայացվում է կորոնավիրուսային հիվանդության (COVID-19) լաբորատոր ախտորոշման «բացասական արդյունքը» փաստող տեղեկանք (տեղեկանքի վաղեմությունը չպետք է գերազանցի 7 օրը): Պետք է ժամանակավորապես ձեռնպահ մնալ նախադպրոցական կրթական հաստատությունում ընդունելություն կազմակերպելուց: Բացառվում է մարդկային կուտակում ենթադրող միջոցառումների` հավաքների ու ժողովների անցկացումը: Չեղարկվում կամ հետաձգվում են կրթական ծրագրով նախատեսված խմբային միջոցառումները (օրինակ՝ հանդեսներ, տոնական միջոցառումներ, ծննդյան տարեդարձներ եւ այլն):

 

Տարածքի ախտահանում

Նախադպրոցական կրթական հաստատությունները վերաբացելուց 1 օր առաջ եւ յուրաքանչյուր աշխատանքային օրվա ավարտից հետո իրականացվում են ընդհանուր մաքրման եւ ախտահանման աշխատանքներ հաստատության ամբողջ տարածքում, ներառյալ բակային տարածքի խաղահրապարակը եւ գույքը՝ կիրառելով 60-80% սպիրտ պարունակող ախտահանիչ նյութեր: Ննջասենյակներում կամ քնելու համար առանձնացված տարածքներում ախտահանումն իրականացվում է քնելուց առաջ, խաղասենյակներում կամ խմբասենյակներում՝ քնի ժամի ընթացքում։ Ճաշելուց հետո տարածքը ախտահանվում է, այդ թվում՝ սեղանները, բռնակները, ծորակները եւ այն ամենն, ինչին երեխաները կարող են ձեռք տալ։ Նախադպրոցական կրթական հաստատություններում իրականացվում է տարածքների (խմբասենյակ, ճաշասենյակ, ննջասենյակ, սանհանգույց եւ այլն) օդափոխում 2 ժամը մեկ: Մուտքի մոտ ապահովվում է 60-80% սպիրտ պարունակող ախտահանիչ նյութերով տարաների առկայություն՝ յուրաքանչյուր մտնող անձի ձեռքերի պարտադիր ախտահանման համար: Հաստատության մուտքի մոտ, սանհանգույցներում եւ հաստատության տարածքում տեղադրվում են փակվող աղբամաններ՝ օգտագործված դիմակները եւ անհատական պաշտպանության այլ պարագաները նետելու համար: Ժամանակավորապես առօրյա գործածությունից դուրս են բերվում այն խաղալիքները եւ այնպիսի իրերը, որոնց ամենօրյա ախտահանում հնարավոր չէ իրականացնել։ Խաղալիքները հավաքվում են առանձին տարաներում, եւ նախքան հետագա օգտագործումը դրանք պարտադիր ախտահանվում են: Աշխատողների համար կանոններ Իրականացվում է աշխատողների եւ երեխաների ջերմաչափում հեռավար կամ անհատական օգտագործման ջերմաչափով օրական առնվազն 2 անգամ, որոնցից մեկը՝ աշխատանքի ներկայանալիս` նախքան կրթական հաստատություն մուտք գործելը: Ջերմող աշխատողին չի թույլատրվում մուտք գործել հաստատություն՝ այդ մասին անհապաղ տեղեկացնելով ՀՀ առողջապահության նախարարության թեժ գիծ` զանգահարելով 8003 համարով: Նախակրթարանի ամբողջ անձնակազմն աշխատանքային եւ ընդմիջման ժամերին ապահովվում է անհատական պաշտպանության միջոցներով (ձեռնոցներ եւ դիմակներ)՝ դրանք 3-4 ժամը մեկ փոխելու հնարավորությամբ:

 

Երեխաների խնամքը

Երեխաներն ապահովվում են ձեռքերի լվացման հնարավորություններով՝ հոսող տաք եւ սառը ջրով,արմնկային կամ ոտնակային կառավարման ծորակներով (անհնարինության դեպքում՝ անմիջապես ախտահանման հնարավորությամբ), օճառով: Սանհանգույց երեխաները հաճախում են մեկական: Ապահովվում է ձեռքերի հաճախակի լվացում, ապահովվում է, որ յուրաքանչյուր երեխա շարունակաբար քնի նույն անկողնում: Անկողնային սպիտակեղենը ամեն օր պարտադիր լվացվում եւ փոխվում է։ Ավագ խմբերում իրականացվում են բացատրական դասընթացներ` կորոնավիրուսի կանխարգելմանն ուղղված միջոցառումների վերաբերյալ:

 

Սննդի կազմակերպումը

Հնարավորության դեպքում երեխաները բերում են սնունդը տնից՝ առանձնացված տարաների մեջ։ Նպատակահարմար է մեկանգամյա օգտագործման սպասքի կիրառումը։ Բազմակի օգտագործման սպասքի կիրառումը հնարավոր է բացառապես պարտադիր ախտահանման պայմանով: