Վերարտադրողականության օժանդակ տեխնոլոգիաների (ՎՕՏ) կիրառմամբ անպտղության բուժումը անապահովության գնահատման համակարգում ընդգրկված բնակչության խմբերի համար մատչելի դարձնելու նպատակով, ՀՀ առողջապահության նախարարության կողմից մշակվել և ՀՀ կառավարության 2015թ. մայիսի 27-ի թիվ 568-Ն որոշմամբ հաստատվել է «Անվճար կամ արտոնյալ պայմաններով վերարտադրողականության օժանդակ տեխնոլոգիաների կիրառմամբ բժշկական օգնության և սպասարկման կարգն ու շահառուներին ներկայացվող պահանջները»:
Սույն որոշման համաձայն՝ սահմանված են պետության կողմից երաշխավորված անվճար կամ արտոնյալ պայմաններով ՎՕՏ-ի կիրառմամբ բժշկական օգնության և սպասարկման հետևյալ ծավալները՝
1. անպտղության պատճառագիտության ախտորոշման և կիրառվելիք մեթոդի որոշման նպատակով իրականացվող համալիր հետազոտությունները,
2. վերարտադրողականության օժանդակ տեխնոլոգիաների կիրառումը` արհեստական սերմնավորման մեթոդով (առավելագույնը 6 փորձ, երեք դաշտանային պարբերաշրջանում մինչև 6 սերմնավորում):
3. մինչ արտամարմնային բեղմնավորումն իրականացվող հետազոտությունները` եթե առկա են արտամարմնային բեղմնավորման իրականացման վերաբերյալ որոշումը և հնարավորությունը հավաստող փաստաթղթեր:
Նույն որոշման համաձայն, պետության կողմից երաշխավորված անվճար պայմաններով վերը ներկայացված ծառայություններից օգտվելու իրավունք ունեն անապահովության գնահատման համակարգում ընդգրկված 30.00 և ավելի բարձր անապահովության միավոր ունեցող նպաստառու կանայք և նրանց ամուսինները, իսկ վերը ներկայացված ծառայություններից արտոնյալ պայմաններով (արժեքի 50%) օգտվելու իրավունք ունեն անապահովության գնահատման համակարգում ընդգրկված 10.00-ից մինչև 30.00 անապահովության միավոր ունեցող նպաստառու կանայք և նրանց ամուսինները:
Շահառուները միաժամանակ պետք է բավարարեն հետևյալ հիմնական պահանջներին՝
1) ամուսինները կամ ամուսիններից մեկը հանդիսանում է ՀՀ քաղաքացի և ամուսնությունը գրանցված է ՀՀ օրենսդրությամբ սահմանված կարգով.
2) առկա է ամուսինների գրավոր համաձայնությունը (եթե մեթոդը արդեն որոշված է)
3) ամուսինները կամ նրանցից մեկը երկու և ավելի տարի տառապում են անպտղությամբ և առկա են ՎՕՏ-ի կիրառման բժշկական ցուցումներ` տրված վերարտադրողաբանական (ռեպրոդուկտոլոգիական) բժշկական օգնության իրականացման լիցենզիա ունեցող բժշկական կազմակերպության կողմից.
4) ամուսիններից` կինը պատկանում է 20-40 տարիքային խմբին:
Վերարտադրողականության օժանդակ տեխնոլոգիաների կիրառման նպատակով քաղաքացիների դիմումների քննարկման և բժշկական կազմակերպություններ ուղեգրման նպատակով ՀՀ առողջապահության նախարարի հրամանով ստեղծվել է հանձնաժողով:
Վերարտադրողականության օժանդակ տեխնոլոգիաների կիրառմամբ պետության կողմից երաշխավորված անվճար կամ արտոնյալ պայմաններով բժշկական օգնություն և սպասարկում ստանալու նպատակով քաղաքացին (դիմումատուն) ՀՀ առողջապահության նախարարության հանձնաժողովին է ներկայացնում հետևյալ փաստաթղթերը՝
1) դիմում, ձևը կցվում է. ներբեռնել այստեղ
2) անապահովության գնահատման համակարգում ընդգրկված լինելու դեպքում՝ 30.00 (անվճար պայմաններով բժշկական օգնություն ստանալու համար) կամ 10.00-ից մինչև 30.00 (արտոնյալ պայմաններով բժշկական օգնություն ստանալու համար) անապահովության միավոր ունենալու վերաբերյալ փաստաթղթերի պատճենները.
3) վերարտադրողաբանական (ռեպրոդուկտոլոգիական) բժշկական օգնության լիցենզիա ունեցող բժշկական կազմակերպության կողմից երկու և ավելի տարի անպտղությամբ տառապելու փաստը և վերարտադրողական օժանդակ տեխնոլոգիայի համապատասխան մեթոդի կիրառման անհրաժեշտությունը հավաստող փաստաթուղթը.
4) օրենսդրությամբ սահմանված կարգով գրանցված ամուսնության մեջ գտնվելու փաստը հավաստող փաստաթղթի պատճենը (ամուսնության վկայական).
5) կնոջ` անձը հաստատող փաստաթղթի պատճենը (անձնագիր, նույնակա-նացման քարտ).
6) ամուսինների/ամուսիններից մեկի` Հայաստանի Հանրապետության քաղաքացի լինելու փաստը հավաստող փաստաթղթերի պատճենները (անձնագիր, նույնականացման քարտ):
Առաջարկում ենք բոլոր նրանց, ովքեր վերարտադրողականության օժանդակ տեխնոլոգիաների կիրառմամբ բժշկական օգնության կարիք ունեն և հանդիսանում են սահմանված պահանջներին համապատասխանող շահառուներ, վերը ներկայացված փաստաթղթերով հանդերձ դիմել ՀՀ առողջապահության նախարարություն՝ Երևան, Կառավարական N3 մասնաշենք, կամ ուղարկել էլեկտրոնային փոստով`
Աղբյուրը՝ Առողջապահության նախարարություն