Այս լուսանկարն արված է Երեւանում: Նոր Նորքում է՝ Սբ. Սարգիս եկեղեցու անմիջապես հարեւանությամբ: Հիմա կմտածեք՝ իսկ ի՞նչ կա որ, ճոճանակ է, որի վրա հրճվանքով ճոճվում է փոքրիկը: Երեւի «Իմ փոքրիկ»-ի անձնակզմն էլ նույնը կմտածեր, եթե դիտեր լուսանկարը եւ ոչ թե լուսանկարեր սարսափելի տեսարանը:
Ճոճանակը տեղադրված է ձորի բերանին՝ բառի ուղիղ իմաստով: Այսինքն՝ երեխայի մեջքի ետեւում ձորն է: Եթե, Աստված մի արասցե, փոքրիկը ճոճվելիս բաց թողնի ձեռքերը եւ հետ գնա, կընկնի Նոր Նորքի ձորակը: Նույնը կպատահի, եթե ճոճանակի շղթաներից մեկը պոկվի: Իսկ եկեք խոստովանենք՝ դա բացառված չէ, հատկապես որ կասկածելի է քաղաքը կահավորելու համար օգտագործվող նյութերի որակը: Բացի այդ, բոլորս ենք հիշում հունիսին տեղի ունեցած ողբերգական դեպքը. փոքրիկ աղջնակը մահացավ այն բանից հետո, երբ երեւանյան բակերից մեկում ճոճանակի ձողը պոկվեց ու ընկավ գլխին:
Եվ սա դեռ ամենը չէ. առջեւում էլ փողոցն է: Վայր, որտեղ ամեն րոպե տասնյակ մեքենաներ են երթեւեւկում:
Հաշվի առնելով, որ այս տեսարանը մեկն է այն հազարավոր տեսարաններից, որոնք ամեն օր մտահոգում, զարմացնում ու բարկացնում են հայ մայրիկներին՝ «Իմ Փոքրիկ»-ն առաջարկում է ընթերցողներին կիսվել իրենց անհանգստացնող խնդիրներով, որոնք առնչվում են մայրության ու մանկության անվտանգությանը, ապահովությանն ու առողջությանը: Ուղարկեք խնդրի կարճ նկարագիրը
Եկեք միասին փորձենք հետամուտ լինել խնդիրների լուծմանը:
Մանկական հավատարմությամբ՝ «Իմ փոքրիկ»