Մայրիկները, որոնց փոքրիկներն ալերգիկ են, հաճախ հետաքրքրվում են՝ կարո՞ղ են իրենք ուտել այս կամ այն սնունդը, դա իսկապե՞ս կազդի երեխայի վրա, ե՞րբ կարող են փորձել: Հարցեր առաջացնող մթերքներից մեկն էլ հանդիսանում է մածունը: Մածունի հետ կապված հանգամանքներն «Իմ փոքրիկ»-ը պարզաբանել է կրծքով կերակրման մասնագետ, նեոնատոլոգ Աննա Տոնիկյանի օգնությամբ:
Մասնագետի խոսքով՝ մածունը կաթնամթերք է, իսկ, առհասարակ, կաթը և կաթնամթերքի մյուս տեսակներն ընդգրկվում են սննդային սուր ալերգիա առաջ բերող ուտելիքների ցանկում: Հետևաբար, այո, մածունը կարող է ալերգիայի աղբյուր դառնալ։ Այնուամենայնիվ, սա չի նշանակում, որ պետք է խուսափել տվյալ մթերքներն օգտագործելուց: Ընդհակառակը` որքան շուտ դրանք մուտք արվեն սննդակարգ, այնքան լավ: Մայրիկը կարող է քիչ քանակով փորձել, որից հետո 2-3 օր հետևի երեխայի վիճակին: Եթե նկատվի որևէ ռեակցիա, ապա երկու շաբաթ չի օգտագործում այդ մթերքը, ինչից հետո նորից քիչ քանակով փորձում է։