Հայաստանի Հանրապետության կրթության եւ գիտության նախարարությունը կազմակերպում է համահայկական մանկապատանեկան նկարչական 3-րդ մրցույթ-փառատոնը` «Սիրե՛ք պոետի գույները» խորագրով:
Մրցույթ-փառատոնին կարող են մասնակցել 6-18 տարեկան հայերեն ուսուցմամբ վարժարանների եւ կրթօջախների, մշակութային կենտրոնների սաները, ինչպես նաեւ այլ դպրոցներ հաճախող հայ եւ օտարազգի պատանիներ:
Մրցույթ-փառատոնը նվիրված է հայ պոեզիային և մասնակիցներից ակնկալվում է վերլուծական և ստեղծագործական անդրադարձ հայ պոետիկ արվեստին առհասարակ կամ առանձին երկերին, բանաստեղծների կերպարներին կամ հայ պոեզիայի զարգացման որեւէ փուլին կամ հանգուցային պոետներին:
Մրցույթ-փառատոնի առաջին փուլի բոլոր հաղթողները կստանան ցուցահանդեսի ալբոմ: Երկրորդ փուլում հաղթողները կստանան նաեւ հիմնական եւ խրախուսական մրցանակներ: Իսկ հիմնական 10 հաղթողները կհրավիրվեն Երեւան մեկշաբաթյա մշակութային ծրագրով:
Այցելության ընթացքում ծախսերը հոգում են կազմակերպիչները, իսկ մասնակիցները հոգում են ճանապարհածախսը:
Համահայկական մանկապատանեկան նկարչական 3-րդ մրցույթ-փառատոնի շրջանակներում նախատեսվում են նաեւ լրացուցիչ միջոցառումներ:
Մասնակիցները պետք է դիմեն մինչեւ հունիսի 3-ը ներառյալ: