2011թ. ընթացքում ամերիկացիները որդեգրելու նպատակով Հայաստանից 22 երեխա են տարել: Որդեգրման վիճակագրությունը տեղադրված է ԱՄՆ արտասահմանյան որդեգրման կառավարական դեպարտամենտի կայքում:
Նախկին խորհրդային պետություններից այդ ցուցակում առկա են նաեւ Ուկրաինան (632 երեխա), Լատվիան (56), Լիտվան (20), Մոլդովան (10), Էստոնիան (7), Բելառուսը (1), Տաջիկստանը (2): Բայց այդ տարածքում առաջատարը Ռուսաստանն է` 970 երեխա 2011թ. ընթացքում: Այն զիջում է միայն Չինաստանին (2589) եւ Եթովպիային (1727):
Ինչպես հայտնում է pravda.ru-ն, 1999-2011 թթ. որդեգրման համար ԱՄՆ են տարվել 45 112 ռուս երեխաներ: 1999-2011 թթ. Չինաստանից բերվել են 66 630 երեխաներ, Ուկրաինայից` 8889, Ղազախստանից` 6421, իսկ ահա Իրաքից, որտեղ վերջին մի քանի տարիներին անդադար պատերազմ է, ընդամենը երկու երեխա: Սոմալիից, որտեղ իրադրությունը նույնպես չի նպաստում մանուկների բարեկեցությանը` 14 երեխա:
Ինչպես նաեւ ԱՄՆ-ի արտասահմանյան որդեգրման կառավարական դեպարտամենտի կայքում կարելի է ծանոթանալ գներին, որոնք ամերիկացիները պետք է վճարեն այլ երկրից բերված որբ երեխայի համար: Չինաստանում այդ թիվը կազմում է 15 930 դոլար, Մոլդովայում`23 365 դոլար, Լեհաստանում` 17 375 դոլար: Այնուամենայնիվ, ամերիկացիներին ավելի շահավետ է որդեգրել արտասահմանում. ԱՄՆ-ում այդ ընթացակարգն արժի առնվազն 30 000 դոլար:
News.am