Հղիության ընթացքում բեղմնավորված ձվաբջջից աստիճանաբար զարգանում է սաղմը, ապա՝ պտուղը։ Այս ընթացքում ձևավորվում և հասունանում են նրա օրգաններն ու համակարգերը, իսկ մայրական օրգանիզմը փոփոխվում է՝ ապահովելով փոքրիկի աճն ու զարգացումը։
Ինչպե՞ս է սկսվում հղիությունը
Բեղմնավորումը տեղի է ունենում, երբ ձվաբջիջը միավորվում է սերմնաբջջի հետ։ Բեղմնավորված ձվաբջիջը շարժվում է դեպի արգանդ և այնտեղ ամրանում արգանդի լորձաթաղանթին։
Հղիության զարգացման ընթացքում ձևավորվում է ընկերքը (պլացենտան), որը կարևոր դեր ունի պտղին թթվածին և սննդանյութեր հասցնելու, ինչպես նաև նյութափոխանակության որոշ արգասիքներ հեռացնելու գործում։ Պտուղն ընկերքին միացած է պորտալարով։ Մոր և պտղի արյունը ընկերքում սովորաբար չեն խառնվում, թեև դրանց միջև տեղի է ունենում նյութերի փոխանակում։
Ինչպե՞ս է զարգանում փոքրիկը
Առաջին շաբաթներից սկսած՝ սաղմը արագ զարգանում է։ Ձևավորվում են նրա հիմնական օրգաններն ու մարմնի կառուցվածքը։
Մոտ 10–12-րդ շաբաթներին արդեն կարելի է տարբերակել մարմնի հիմնական մասերը։ Պտուղը շարժվում է, թեև մայրիկը հիմնականում դեռ չի զգում այդ շարժումները։ 12-րդ շաբաթում պտղի երկարությունը մոտ 5-6 սմ է, իսկ 14-րդ շաբաթում՝ մոտ 8-9 սմ։
Հետագա ամիսներին պտուղը շարունակում է արագ աճել և զարգանալ։ Նրա շարժումներն աստիճանաբար ավելի ակտիվ են դառնում, և շատ մայրիկներ առաջին շարժումները զգում են մոտավորապես 18-24 շաբաթականում։
Ի՞նչ է տեղի ունենում հղիության վերջին ամիսներին
Հղիության ընթացքում արգանդը մեծանում է, իսկ պտուղը՝ շարունակում աճել և հասունանալ։ Վերջին շաբաթներին պտուղն աստիճանաբար ընդունում է գլխային դիրք՝ պատրաստվելով ծննդին, սակայն բոլորը չէ, որ այդ դիրքն են ունենում։
Մոտ 36 շաբաթականում երեխան կարող է արդեն իջնել դեպի փոքր կոնք, սակայն դա չի նշանակում, որ ծննդաբերությունն անմիջապես կսկսվի։
Ինչպե՞ս է սկսվում ծննդաբերությունը
Ծննդաբերության սկզբում արգանդի կծկումներն աստիճանաբար դառնում են ավելի կանոնավոր և ուժեղ, իսկ արգանդի վզիկը փափկում, կարճանում և բացվում է։ Երբ այն ամբողջությամբ բացվում է՝ մոտ 10 սմ, երեխան կարող է անցնել ծննդաբերական ուղիներով։
Ծննդաբերությունն ընդունված է բաժանել երեք փուլի․
Առաջին փուլում արգանդի վզիկը բացվում է մինչև 10 սմ։
Երկրորդ փուլում երեխան անցնում է ծննդաբերական ուղիներով և ծնվում։
Երրորդ փուլում երեխայի ծնվելուց հետո արգանդից անջատվում և դուրս է գալիս ընկերքը։
Երեխայի ծնվելուց հետո պորտալարը սեղմվում և կտրվում է։ Դրա մնացորդը հետագայում չորանում և ընկնում է՝ ձևավորելով երեխայի պորտը։
Իսկ պտղաջրե՞րը
Երեխան արգանդում գտնվում է պտղաջրերով լի պտղապարկի մեջ։ Պտղաջրերը ստեղծում են պաշտպանիչ միջավայր, օգնում են պահպանել համապատասխան ջերմաստիճանը և հնարավորություն են տալիս պտղին շարժվել ու զարգանալ։
Իսկ ինչպե՞ս է փոխվում մայրիկի օրգանիզմը
Աճող արգանդի պատճառով որովայնն աստիճանաբար մեծանում է։ Հղիության ընթացքում կարող է նաև հաճախակիանալ միզելու ցանկությունը, քանի որ աճող արգանդը ճնշում է միզապարկը։ Կրծքագեղձերը նույնպես փոփոխվում են և պատրաստվում են կրծքով կերակրմանը։
Հղիության մոտ 40 շաբաթը միջին հաշվարկային տևողություն է, սակայն ծննդաբերությունը կարող է սկսվել դրանից ավելի վաղ կամ ուշ։
